بردنی نۆش ئافەرین بۆ گوڵزار و ڕەوزەی دڵگوشا لەلایەن زەلغەم و دەلغەمەوە
لە کتێبی:
سوڵتان ئیبراهیم و نۆشافەرین
بەرهەمی:
خانای قوبادی (1704-1778)
2 خولەک
647 بینین
وەختێ کە عەلقەم شازادە هۆرگرد
ڕووبەڕووی دەریای موحیت بەرئاوەرد
لەدوای ئەوان زەلغەم و دەلغەم
حازر بین بەو کاخ بەدانی ئەلەم
دین نۆش ئافەرین کەس نییەن جەلاش
بۆ عەلقەم دێو زوو کەوتن تەلاش
جە نۆش ئافەرین سوالات پرسی
واتن کۆن عەلقەم زوو بە دڵسۆزی
نازار دا جەواب نازانم جە کۆن
منیچ شەش ساعەت هیچ نەداروو شۆن
زەلغەم و دەلغەم هەردوو نابێکار
بە شیرین زوبان ئامان بە گوفتار
واتن ئەی نازار نازار باوان
ئەڵبەت شازادە ئاما وەی مەکان
ئاد بی وە باعیس عەلقەم برامان
ئیستە ئەی نازار دەستم بەدامان
زەلغەم و دەلغەم هەر دوو نابێکار
هەر دوو پەرێشان ئامان بە گوفتار
واتن شازادە ئامان وەی مەکان
بییەن وە قاتڵ عەلقەم برامان
ئیسە ئەی نازدار نەداریم چارە
کاکەم سەرگەردان مات و ئاوارە
زەلغەم و دەلغەم واتن ئەی نازار
هۆرێزە بشین وەسەیر گوڵزار
بشین وەسەیران ڕەوزەی دڵگوشا
نەو جاگەی فەرەح پڕ سەیروسەفا
شای نۆش ئافەرین بەدڵەی مەلوول
حەرف زەنگییان زوو کەردش قەبوول
شی بە دۆش دێو شای نۆش ئافەرین
بەدڵەی خەمناک چەم پڕ جە ئەسرین
زەلغەم و دەلغەم شۆخ دڵروبا
یاوان بەمەکان ڕەوزەی دڵگوشا
نازارشان نیا جەو مورغزارە
نەو سەیران باغ گوڵ و گوڵزارە
دێوان هەردووشان ئامان بەگوفتار
واتن نازەنین مای پەری ڕوخسار
ئەر عەلقەم مەردەن ئێمە حازریم
هەر دوو چون غوڵام دایم نازریم
دایم مەشغووڵیم بە خاکساری
هەم مەیوون بەکار خدمەت گوزاری
جەو بۆنە ئەی شۆخ شای شیرین چارە
تۆمان ناوەردەن بەی مورغزارە
* ئینە جاگەی خۆش سەبزەو گوڵزارەن
دایم چەنی گوڵ ماچی بەهارەن
بنیشە تێدا پەی وێت بە دەماغ
بشۆ بە سەیران سەوزە و گوڵ و باغ
با ئەی قسەوباس ئەی لاڵە و ئامان
بمانۆ نەتۆی هەم دڵەی بوریان
با نۆش ئافەرین جە سەیران گوڵ
بمانۆ نەوجا بە ئارەزووی دڵ
بشین بە سەروەخت سوڵتان ئیبراهیم
نگادارش بۆ خواوەند دایم