birdinî noş aferîn bo gułzar û řewzey diłguşa lelayen zelẍem û delẍemewe
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
2 Xulek
468 Dîtin
wextê ke ’elqem şazade horgird
řûbeřûy deryay muḧît ber’awerd
ledway ewan zelẍem û delẍem
ḧazir bîn bew kax bedanî elem
dîn noş aferîn kes nîyen celaş
bo ’elqem dêw zû kewtin telaş
ce noş aferîn swalat pirsî
watin kon ’elqem zû be diłsozî
nazar da cewab nazanim ce kon
minîç şeş sa’et hîç nedarû şon
zelẍem û delẍem herdû nabêkar
be şîrîn zuban aman be guftar
watin ey nazar nazar bawan
ełbet şazade ama wey mekan
ad bî we ba’îs ’elqem biraman
îste ey nazar destim bedaman
zelẍem û delẍem her dû nabêkar
her dû perêşan aman be guftar
watin şazade aman wey mekan
bîyen we qatił ’elqem biraman
îse ey nazdar nedarîm çare
kakem sergerdan mat û aware
zelẍem û delẍem watin ey nazar
horêze bişîn weseyr gułzar
bişîn weseyran řewzey diłguşa
new cagey fereḧ piř seyrusefa
şay noş aferîn bedłey melûl
ḧerf zengîyan zû kerdiş qebûl
şî be doş dêw şay noş aferîn
bedłey xemnak çem piř ce esrîn
zelẍem û delẍem şox diłruba
yawan bemekan řewzey diłguşa
nazarşan nya cew murẍizare
new seyran baẍ guł û gułzare
dêwan herdûşan aman beguftar
watin nazenîn may perî řuxsar
er ’elqem merden ême ḧazrîm
her dû çun ẍułam daym nazrîm
daym meşẍûłîm be xaksarî
hem meyûn bekar xidmet guzarî
cew bone ey şox şay şîrîn çare
toman nawerden bey murẍizare
* îne cagey xoş sebzew gułzaren
daym çenî guł maçî beharen
binîşe têda pey wêt be demaẍ
bişo be seyran sewze û guł û baẍ
ba ey qisewbas ey lałe û aman
bimano netoy hem diłey buryan
ba noş aferîn ce seyran guł
bimano newca be arezûy dił
bişîn be serwext sułtan îbrahîm
nigadarş bo xwawend daym