agadarbûnî şazade le winbûnî noş aferîn
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
6 Xulek
476 Dîtin
xana ey dunyay bê tan û bê po
gerdelûl asa meyo mewyero
ey dunyay bê şerim nedaro binyad
hîç kes be dunya dił nekero şad
xana ey dunya nemeyo be kar
ey dastan waçe perî řozgar
bişîn beserweqit murẍ xoş aheng
sułtan řeha kerd negełûy neheng
horgirt bê mudar řû ce bała kerd
teşrîf beseray qesir ’elqem berd
be endek zeman ama be payn
ahêste û aram nya wezemîn
sułtan horêza řû be sera kerd
teşrîf we camřêz ḧerimsera berd
herçend megêła new qesir û cêda
şay noş aferîn nimebo peyda
weqtê ke zana hîç nîyen dyar
xeylê ne ewca girewa bezar
axir wat ey řux nîyen cay midar
ba bişîn welay yaran ẍemxiwar
bełkim tedbîrê bisazîn çare
bawerîn bedest dułber dûbare
murẍ ke êd şineft ama we perwaz
girt bedoşewe şêr ser’efraz
perwaz kerd neca murẍ bî endêş
şazade yawa beyaran wêş
weqtê nîga kerd yaran dî we çem
hûnaw ce dîde merêzna we hem
mewat zamanim ce no xeter bî
řo bero derdim fîşter newer bî
xan miḧemed watiş ey şêr salar
menîşe matem peşêw û ẍembar
sûdê nedaro zarî kerdenit
pejare û hîcran nedił berdenit
bwaçe berux řahî bo nerah
bişo bigêło seḧra û guzergah
neher mekan bo bikeroş peyda
xeber bawero perê hweyda
şazade dersat řux kerdiş tełeb
watiş dexîlim êdmen metłeb
bişo bigêłe neřûy serzemîn
bawere xeber şay noş aferîn
řux ke êd şineft cenew perwaz kerd
gêła êqlîmat keş û ko ta herd
sê şew û sê řoj beřûy hewawe
betaw û te’cîl lwa be řawe
megêła betaw be gah û bê ga
dîş hane çîmen řewzey diłguşa
gêławe wepes murẍ wefadar
xeber dos awerd pey yar ẍembar
ne řûy hewawe wêş kerd aşkar
yawa be xidmet yaran ẍemxiwar
’erz kerd şazade mah ḧorî leqa
ha le mêrẍuzar řewzey diłguşa
zelẍem û delẍem herdû nabêkar
nîşten hamzanû mekeran guftar
şazade watiş ey murẍ diłkêş
min biber bew caw zû byawnem pêş
karê bew destûr bikerûm pêşan
bigrewan pey ḧał bedbextîy wêşan
sa ke şineftiş murẍ piř kemał
şazade nya we mabeyn bał
perwaz kerd çun teyr berdiş behewa
derdem şazade berdiş bew mawa
şabał winara nyaş wezemîn
wat dêdem ye to ye noş aferîn
sułtan maçîn yarş dî we çem
agir wegyan bî řû awerd werem
zelẍem dîş ama nebîrey ’adił
lerza ji û samş sersam bî xicił
celad wêş dî kêşa ah serd
horêza we pa çinarê hor gird
ne’rete pêka çûn ebir behar
pey şehzadey çîn awerd pelamar
wat ademîzad ebley xeyał xam
xûnî dû dêdey ’elqemî biram
’elqemî biram çêş ama û we ser
ji řah řasî wenem ’eyan ker
watiş ey zelẍem biray ’elqeme
’elqeme kuştim nobey zelẍeme
zelẍem je watey sułtan maçîn
coşa û xiroşa çî weqar û qîn
mel’ûn çinarêş berdiwe ban ser
gerdiş ḧewałey sułtan serwer
sułtan maçîn serdar serḧed
çinar ’îfrît ji wêş bikerd řed
ewsa jew dima nam yezdan berd
hełmet da yek şax delẍem dêw kerd
yek muşt wezerbet pêka wegerden
yawnaş wenezi’ şerarey merden
ju zerbey ziber sułtan maçîn
mel’ûn meleq werd bêhoş we zemîn
şêr şikarî nîşt weřûy sîneş
benaş bî serş cuda key celeş
delẍem dî zelẍem wexten bo helak
horêza we pa dêwî dehen çak
çinarê horgirt petyarey le’în
ama beřê qest sułtan maçîn
bazû bułend gerd mel’ûn murdar
dest da be şimşêr şazade namdar
ełmas abdar pêkaş we kemer
kerdiş wedû nîm çûn xyarî teř
laşey petyare xełtan bî ne xak
ama ke mel’ûn zelẍem keyt helak
zelẍem dî delẍem şeq bî we’ełmas
lerza wêney bîd bikerd îltîmas
watiş ey cewan zordar zor mişt
beşq şêran temam ’alem gişt
ne şêr û ne bebir ne dêwan qaf
beraber be to nîyen řay mesaf
îqrarim kerden we îxlas pak
herkes pişt min bidero ne xak
ta řojê zîndem, bewkes bende bûm
bendey fermanber her ta zînde bûm
ta emřo hîç kes min xakî nekerd
hîç kes çenî min newî ham neberd
destim wedaman qehreman qîn
qetrey hûn min meřêz wezemîn
jiray merḧemet ji gunam biguzer
bibexşem wenîm tac gewhertac ser
dû biram kuştî henî mirweten
merd mirwet daren namerd sifleten
ermerdî mirwet merdanegît hen
min qesas meker şêr hunermen
zelẍem dî ama şazadey guzîn
horêza we pa ew dêwî le’în
dêwî bedneyjad zuban kerd guşad
ẍuřa be heybet wat ademîzad
’elqem û delẍem bezarî û ’ezab
kax suleyman to kerdî xerab
îste dûbare çêşen kam to
karê kerûm pêt fewt bo nam to
dirextî şimşad girte bê bedest
xiroşa bekîn çun fîlan mest
ama bişano pey bahoy bałş
derdem şazade girtiş dûbałş
miştê weheybet da nekelley ser
kefit neřûy zemîn dêwî bedgewher
bezarî û zewîr wat ey namwer
mebûm musłiman bedanay dawer
buyer ce teqsîr min şermesarim
to řeḧimit bibo ce gyan bêzarim
dêwiş řeha kerd şêr hunermend
watiş tom bexşa ce řay xwawend
murẍ watiş ey şêr dêw meker řeha
ḧerfiş batłen dêw řûsya
şazade ce řux nama we cewab
řûkerdiş welay mah cehan tab
* dest kerd negerden şad bî webałaş
bo seda guna herałey ałaş
şazade watiş murẍ wefadar
noş aferîn we puşt wêt kere swar
wêş beşan dêw sya bî swar
ta şîn bemenził yaran ẍemxiwar
yaran ke dîşan şazadey çalak
ha ama we xeyr ce řay xeternak
şîn we pêşwaziş kerdişan senaş
bo sedan beşewq gerd xak paş
şazade cêşan kerdiş newaziş
ezhar kerd pêşan řaz û guzarş
bê ḧed ew yaran şukirane kerdin
sucde bedergay xwawend berdin
new ca dirextê pîr kone sał
wamendey dewran berz bê mêsał
nezîr sayey dar cagey xoş nişîn
tertîb kerdişan pey noş aferîn
şay noş aferîn bew saye berdin
wêşan nepay dar mudara kerdin