لە خەو هەستانی نۆش ئافەرین و خۆڕازاندنەوەی خۆی
لە کتێبی:
سوڵتان ئیبراهیم و نۆشافەرین
بەرهەمی:
خانای قوبادی (1704-1778)
3 خولەک
537 بینین
جە لوتف حەکاک زەمانەی وەرین
جە نەو بواچوون داستان شیرین
شای نازەنییان نەوتووڵ نەوخێز
چون غەزاڵ هەرد نە جا کەرد ئاخێز
هۆرێزا نە خاو شای شیرین کەماڵ
شستوشووی جەماڵ ئاوەرد نەخەیاڵ
ئاو کەرد بە زوڵفان موشک تاتاردا
چون شەونم بەهار وە ڕووی گوڵزاردا
وات ئەی سەروەناز مایەی بەخت من
خاس کێشک کێشای نەپای تەخت من
کەنیز خەندە کەرد وەبێ گفتوگۆ
وات خانم یارت موبارەکت بۆ
ئەو یارە کێ بی شەو نەسەرینت
دەس مەدا نەزوڵف سیای چین چینت
دەم مەنیا نەتۆی حوقەی دەهانت
گاگا مەبۆسا کام و زوبانت
خانم ئێدشنەفت شای شیرین شەکەر
نەدورج دەهان ڕێزنا گەوهەر
وات ئەی سەروەناز نازدار نازم
مەخفی بۆ جەلات ڕازو نیازم
نەدەری بەدەر ڕاز نەهانیم
هەر تۆ بزانی هەر من بزانیم
کەنیز وات بە زات دانای کردگار
مەگەر وە مەردەن کەرووم ئاشکار
مەر ئەو دەم ڕازت واچووم بە زوبان
وە تۆتیا بۆ ڕێزەی ئیستوخوان
ئەو ڕۆ تا بەشام دوڕ ئەرزانش بێ
هەر ئێد گفتوگۆی دڵدارانش بێ
تا وەقت ئێوار تاقەتش بڕیا
کوورەی نارعەشق نەجەرگش گڕیا
تەڵەب کەرد دایە وات ئەی هامڕازم
ڕەفیق موونس مەحرەی ڕازم
ئارۆ یەک گوفتە ها نە دەماغم
ئیمشەو ئارەزووی گوڵزار باغم
ئێمشەو یەک جەوان مێهمانمانەن
هەم دیدە و هەم ڕۆح هەم جانمانەن
فیدات بام دایە یار غەمخوارم
چراغان کەرە باغ گوڵزارم
گوڵاوپاشی کەن تەمام ئەخیاوان
بۆ بدۆ نەبۆی حەوز و سەراوان
جەبۆی عەتر گوڵ دەنگ بوڵبوڵان
ئاوان جاری بۆ ها نەپای گوڵان
نەرووی سەبزەی باغ فەرش ئەندازی کەن
زینەت ئارایش ساز بازی کەن
ئەسباب موترێب بەسازی سەد ڕەنگ
چەنی موترێبان شەیدای شۆخ شەنگ
چەقانە و ڕوباب مەی و عوود و ساز
چەنی ساقیان تەنکەی خۆش ئاواز
تەراح بلوور (زیر) جام تەڵاکەش
بمانۆ جەرەنگ شەوق ڕووی ئاتەش
خولاسە هەر نەوع دڵ مەبۆ خواهان
حازر بۆ نەو بەزم سەرکار شاهان
یەک یەک نەجای وێش حازر بۆ تەمام
نەرووی چەقانە وەقت شورب و جام
ئیمشەو من خەیاڵ سەیر باغمەن
ئارەزووی هەوەس شەو چراغمەن
بە فەرمان ئەمر شای شیرین جەماڵ
دایە هۆرێزا دەرزەمان دەرحاڵ
کەفت وەکارسازیی ئەساسەی شەراب
چەنگ و چەقانە بەربەت و ڕوباب
بە فەرموودەی ناز شۆخ دڵارام
ئەساسەی موترێب کەردن سەرئەنجام
چەند دەست ڕەختوخاو ئاوەردن وە بەر
وست نەدەورا دەور حەوزان مەڕمەڕ
تەخت جەواهێر دانەبەندکاری
جە لەعل و گەوهەر پایە مرواری
نیاشان بەناز پەی شۆخ دڵدار
دەنگ بوڵبوڵان نەگوڵ و گوڵزار
وەقتێ ئەساسە تەرتیب بی تەمام
دایە شی بەلای شۆخ جەمین جام
واتش هۆرێزە شۆخ جەمین جام
ئەساسەی موتریب کەردەنم تەمام
هۆرێزا وە پا سەوڵ خەرامان
نەپای قەسر زەڕ ئاما بە دامان
چون شاباز شۆخ بە ئارزووی دڵ
داخڵ بی وە تۆی ئەو گوڵزار و گوڵ
بەچاو نیگا کەرد بەدڵ ئینتیزار
کەی بەیۆ بەوجا ئەو یار دڵدار
دیدە نەرابی ئەوشۆخ نازدار
کەی بەیۆ وەباغ شێربەچەی خوونخوار
تاج نیا وە سەر شۆخ دیدە مەست
جفتێ شەمامەی ئەحمەر گرت وەدەست