le xew hestanî noş aferîn û xořazandinewey xoy
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
565 views
ce lutif ḧekak zemaney werîn
ce new bwaçûn dastan şîrîn
şay nazenîyan newtûł newxêz
çun ẍezał herd ne ca kerd axêz
horêza ne xaw şay şîrîn kemał
şistuşûy cemał awerd nexeyał
aw kerd be zułfan muşk tatarda
çun şewnim behar we řûy gułzarda
wat ey serwenaz mayey bext min
xas kêşk kêşay nepay text min
kenîz xende kerd webê giftugo
wat xanim yarit mubarekit bo
ew yare kê bî şew neserînit
des meda nezułf syay çîn çînit
dem menya netoy ḧuqey dehanit
gaga mebosa kam û zubanit
xanim êdşineft şay şîrîn şeker
nedurc dehan řêzna gewher
wat ey serwenaz nazdar nazim
mexfî bo celat řazu nyazim
nederî beder řaz nehanîm
her to bizanî her min bizanîm
kenîz wat be zat danay kirdigar
meger we merden kerûm aşkar
mer ew dem řazit waçûm be zuban
we totya bo řêzey îstuxwan
ew řo ta beşam duř erzanş bê
her êd giftugoy diłdaranş bê
ta weqit êwar taqetiş biřya
kûrey nar’eşq necergiş giřya
tełeb kerd daye wat ey hamřazim
řefîq mûns meḧrey řazim
aro yek gufte ha ne demaẍim
îmşew arezûy gułzar baẍim
êmşew yek cewan mêhmanmanen
hem dîde û hem řoḧ hem canmanen
fîdat bam daye yar ẍemxiwarim
çiraẍan kere baẍ gułzarim
guławpaşî ken temam exyawan
bo bido neboy ḧewz û serawan
ceboy ’etir guł deng bułbułan
awan carî bo ha nepay gułan
nerûy sebzey baẍ ferş endazî ken
zînet arayş saz bazî ken
esbab mutrêb besazî sed řeng
çenî mutrêban şeyday şox şeng
çeqane û řubab mey û ’ûd û saz
çenî saqyan tenkey xoş awaz
teraḧ bilûr (zîr) cam tełakeş
bimano cereng şewq řûy ateş
xulase her new’ dił mebo xwahan
ḧazir bo new bezim serkar şahan
yek yek necay wêş ḧazir bo temam
nerûy çeqane weqit şurb û cam
îmşew min xeyał seyr baẍmen
arezûy hewes şew çiraẍmen
be ferman emir şay şîrîn cemał
daye horêza derzeman derḧał
kefit wekarsazîy esasey şerab
çeng û çeqane berbet û řubab
be fermûdey naz şox diłaram
esasey mutrêb kerdin ser’encam
çend dest řextuxaw awerdin we ber
wist nedewra dewr ḧewzan meřmeř
text cewahêr danebendikarî
ce le’il û gewher paye mirwarî
nyaşan benaz pey şox diłdar
deng bułbułan neguł û gułzar
weqtê esase tertîb bî temam
daye şî belay şox cemîn cam
watiş horêze şox cemîn cam
esasey mutrîb kerdenim temam
horêza we pa sewł xeraman
nepay qesir zeř ama be daman
çun şabaz şox be arzûy dił
daxił bî we toy ew gułzar û guł
beçaw nîga kerd bedił întîzar
key beyo bewca ew yar diłdar
dîde nerabî ewşox nazdar
key beyo webaẍ şêrbeçey xûnxiwar
tac nya we ser şox dîde mest
ciftê şemamey eḧmer girt wedest