řoyştinî sułtan îbrahîm bo baregay noş aferîn
From the Book:
Suɫtan Îbrahîm û Noşaferîn
By:
Khana Qubadi (1704-1778)
9 minutes
662 views
goş biden we řaz zemaney werîn
beyan kem řazan şay noş aferîn
ser ta pa lîbas şewřengî poşa
ayr hewes ne ferqiş coşa
kemen tełeb kerd ce xeyatey xam
ḧełqey tay kemend best ne řûy endam
bew tewr ne ferqiş zor awerd hewes
ne xof ne şa kerd ne bîm ce ’es’es
ḧemîd û wezîr berdiş we řefîq
ce xuday bała tełeb kerd tofîq
ta şîn we pay qesir şox diłpesend
des girt be tenaf ser ḧełqey kemend
kemend hewa da pey gozergay bam
gîr da ne tuřey seray diłaram
tekan da be wêş şêr diławer
şî we bałay bam wêney kebûter
cew dima kemend awêzan kerdiş
wezîr û ḧemîd we bała berdiş
ce bałay sera lwa ne daman
be ’ezim dîdar, sewł xeraman
baẍê dîn çi baẍ ’eceb gułzarê
nîyen ce seray hîç şehryarê
muşk bo, xoşřeng çiraẍan be kul
nesrîn û sosen bîyen medaxil
’er’er çinaran ce berzîy demaẍ
kerden sayeban xyaban baẍ
řacey xusrewî ne pay çinaran
meřeqsan we řeqis neẍmey hezaran
murẍan xoşxiwan heryek ne darê
we saz û awaz girten kenarê
tezerwan we bang gułbang yahû
qumryan gim gim hudhudan pûpû
şewq ciqey tawis deng bułbułan
aman pexiş bîyen ew ne pay gułan
sersewz û borçîn ne řûy gulawan
deng çerx baz menîşt ce kawan
tezerwan çenî fîrqey bułbułan
seday soz saz ne pay kiławan
çemey aw saf wêney şîr û qend
saf û xoşgewar danayan pesend
carîyen ne řûy sewzey fezawe
wêney mirwarî be řûy teławe
cergey narwen dar erẍewan
ce şinoy nesîm laḧewl mewanan
larey yasemen wêney tacdaran
sîb û beyî boxoş ne sayey daran
kes wesif senaş temam nekerden
nimebo temam ta be řoy merden
satê ḧeyran bîn be řûy baẍewe
bew guł û gułzar şewçiraẍewe
cew demda lwan be cay pêwarê
ne sayey dirext ye şîrîn darê
yaran ne pay dar girtişan qerar
şazade řû kerd ney qesir diłdar
yawa be toy qesir şêr bê endêş
esła xof nekerd, hîç nama teşwêş
nîga kerd hefit burc çun burc exzer
temamî ce zeř hem le’il û gewher
arastey ustad ḧekakan kar
heftad ḧełqey nab ce duř şehwar
nîga kerd şexsê zumuřudî tiraz
ce toy qesir zeř nyan besed naz
yek des řextixiwab ew be wêney guł
wisten nerwî text daney medaxił
yek nazenînê hane dilê řext
bîyen we ḧeyran řext û qesir û text
şewq mido benaz şox nazenîn
şem’ê neserîn, yekê ne payn
çem nyan we hem şox diłřuba
boy ’etir ’enber meyone ewca
megřîw çun şem’ qesir û ’emaret
diłey derdînan medo we ẍaret
bey şikił û şêwe şox (nawerî)
nîyen çi aram neḧorî û perî
erbeyo zuban temam mûy e’zam
wesif cemałş nimebo temam
çêşiş beyan kem ’ałem bizano
ḧeyfen cewahêr mexfî bimano
şîrînê wey tewr ce pa ta we ser
nîyen ce sûret butxaney azer
ce qaf tabeqaf bey tewre şîrîn
wey şox û řendî nebîyen aferîn
dîde çun ceyran perwerdey pay kaw
herkes mewîno saf mebo be aw
hergîz bey destûr nadrey nayab
ne kes şineften nedîyen be xwab
celay sya zułf dane řûy cemał
bîyen we perdey řêze řêzey xał
ey şêwey nazk ser ta pa şîrîn
nerûy zemane nebyen aferîn
ebruwan keman qews asay qudret
xem kerden bedest qewas sen’et
muje han be xûn diłdoz qatił
ẍezeb û bê bak ’edû çenî dił
dû dîdey xomar řeşîdey piř naz
mest sûr (mekeyf) ’aşiqan newaz
guł aray cemîn neqiş nîgaren
çiman ke gułzar fesił beharen
sergona guł guł bewêney ateş
çun le’il me’den ab dîde keş
zerdîy bûm nedewr bûm zarî zerałş
bîyen we tertîb cam cemałş
perdey leb yaqût qirimz abdar
pesend û meḧbûb şahan xerîdar
dehen ẍunçey guł şikuftey taze
bułbuł be mînqar kerden endaze
peřen ce yaqût maçan bedelîl
me’den buq’edoz çeşmey selsebîl
safîy say gerden ta sedirsîne
medrewşo bereng nedaro wêne
xulasey kelam ce ser ta daman
řijyan be leqay sen’et subḧan
şazade êd dî ew şêr bê bak
satê bê xud bî nerûy text xak
cedmay yek sat hem ama be hoş
horêza ne xak bewr piř be coş
şazade bê deng şî be serînş
dya bew cemał şox şîrînş
dîş ke nazenîn neşîrîn xawen
zułfanş nedewr cemîn beławen
surme nedewran dîdeş merêzo
boy ’etirş ’enber şahan mebêzo
boy ’etirş meyo çun ’etir ’etar
’etirş mebêzo boy muşk tatar
sake wey tewr dî şazadey çînî
ey baz teřlan wey nazenînî
dem berd bosa řûy ḧełqey dehanş
sêraw bî ce aw çeşmey cînanş
waçe xizir bê yawa we zułmat
ya xo murde bê pêş yawa ḧeyat
be temenay dił mebosa bekam
ta îştîhay wêş xałî kerd temam
axir des berdiş pencey nazenîn
nigîn kend ce dest serpencey şîrîn
nigîn piř şewq awerdiş pey wêş
ce dest ew kend kerd bedest wêş
enguşter wêş ber’awerd nedest
kerdiş ne’enguşt şox dîde mest
xeylê nîga kerd ew qesir diłdar
dîş yek xwanî zeř temamî teyar
peřen nete’am ałay diłpesend
tu’mey pakîze şehd şîrey qend
dest kêşa serpoş ceser řeha kerd
be arezûy dił te’amê hem werd
horêza lwa ta yawa be baẍ
be keyf û ’îşwe be şadîy demax
yawa beyaran karukirdarş
wana perêşan kirde û řeftarş
yaran guzeştey ey cewan zanan
bew şêr piř zat aferîn wanan
horêza we pa şêr hunermend
hem dîsan we pêç serḧełqey kemend
cebałay ḧesar lwan bedaman
be’ezim menził wêşan bîn řewan
bazhem bew destûr şî nebałînş
řoşin kerd şemi’dan neřûy serînş
dîş ke nazenîn ne şîrîn xawen
zułfanş nedewr gonaş beławen
des berd burqey zerd hordawe nerûş
be îştîhay dił meyl û arezûş
peyapey benaz mebosa bekam
ta îştîhay dił xałî kerd temam
destidrazî kerd we pencey xameş
bigêro bedest topey şemameş
ew şox teřłan çun tuřey şahî
nîyen qerînîş cemeh ta mahî
cexaw bî bêdar dîş yek cewanê
nîşte bê, ce laş wêney (yemanê)
betundî û çalak şox dîdemes
dest awerd girtiş yexey bend des
be baho wêney řostem dastan
be řeng çun xusrew şazadey mestan
be çîhre û cemał bedir kamił bî
guł wêne, řuxsar gułzar guł bî
şêrê bey destûr nadrey zordar
nîyen qerînş neřûy řozgar
ne wekû řostem ferzend załen
ne çun feramerz saḧêb gopałen
sake bey destûr ew şîrîn guzîn
berşî celaş hoş şay noş aferîn
’aşiq bî be şewq şêwey cemałş
kerd we payendaz fîrozey xałş
kefit nexak paş şay şîrîn çare
ser kerd we fîday ew guł řuxsare
watiş fîdat bam şay diławerî
şay kam îqlîmat kamîn kîşwerî
ẍezał gułzar kam dyarenî
tawis serteł kam ’uzarenî
bey destûr cemał nûrḧeq řişte
to ce ademî ya ce firîşte
weş amay we xeyr gyanim fîdaten
nûr bînayîm qedmigay řaten
şazade zanaş mubteła bîyen
meyzedey ’eşqen midaraş nîyen
wat min şazadey çîn û maçînim
îste ke ẍerîb ey serzemînim
dest berdipey gerden zucac piř şewq
bazû negerden nazdar kerdiş tewq
dem nyane toy ḧewqey neyşeker
menoşa şerbet serçeşmey kewser
dû ’endelîb bîn heryek nebaẍê
axir bîn we guł heryek neşaxê
menoşan şerbet herdû bedłiwaz
ḧasił bî temam mude’a û nyaz
horêza we pa şay şîrîn řuxsar
dest berd pyałan awerd neřûy kar
awerdiş we pêş şerabey piř mey
bade menoşan çenî hem pey pey
gagah dem we leb mekerdin wasił
mekerdin behem kam řeway dił
cey ’eyş û noş bîn ta şefeq bî şeq
be şadî û demaẍ wiyardin bezewq
noş aferîn wat gyanim bo fîdat
ce řenc řahan çêş ama neřat
ce eweł derya ta textey pare
yawna be’erz şay şîrîn çare
cey saz û řaz bîn ta be sub seḧer
ta weqit we’dey ełahu ekber
we’dey tilû’ bî horêza we pa
hîmet tełeb kerd ce xurşîd leqa
noş aferîn wat gyanim tufeylit
peywenden řiştey canim be meylit
mêhir to yeqîn nesefḧey diłda
cagîren çun xar neperdey gułda
nîm sa’et bê to, ji yanim nîyen
aram û taqet tewanam nîyen
ahîr ’eşqit necergim keften
dił zuxał asa ce şewqit siften
şazade watiş besergerdit bam
kemend şewqit besten dest û pam
be bê řezay dił mebo buyerît
bełkim çareyê ser’encam kerît
řeza nařeza hîmet xwahî kerd
ta teşrîf belay yaran wêş berd
yaran we’îxlas şîn we pêşwaziş
seruten kerdin we payendaziş
guzeştey wêşan pêşan ’eyan kerd
xan miḧemed sujdey şukir xwa berd
şikawan çun guł gułzar şayî
kerdişan neşa mubarek bayî
ewřo new menził girtişan aram
beşadî û bezewq tabewadey şam