داستان آمد سعد بن منیف بن سلام ثقفی به خواستگاری لیلی
لە کتێبی:
لەیلا و مەجنوون
بەرهەمی:
خانای قوبادی (1704-1778)
4 خولەک
957 بینین
جە تەئسیری چەرخ، چەپگەرد گەردوون
مەحبووبیی لەیلێ و مەفتوونیی مەجنوون
شایع بی نە عام، بی وە ئاوازە
جەهانێ جە عەشق جە نۆ بی تازە
جە حیجاز و نەجد تا موڵک عیراق
شێخ و سوڵتانان ساحێب تەمتەراق
شنەوان بە گۆش شوهرەت لەیلێ
خواستگارش بین فەراوان خەیلێ
پەی دیدار بینی ئامان وە جەهدی
ئەشغاڵ کەردەن ئەرگ، دەربار مەهدی
ئەعزەم و ئەفخەم، جە گرد باڵاتەر
ساحێب زۆر و زات جە گشت واڵاتەر
سعد بن مونيفعەرەبی فەرزەند سەلام
سەقەفی مەشهوور، نە عەرسەی ئەییام
ئاما وە خوتبە و خواستگاریی لەیل
مەهدی مائیل بی بە ڕەزا و بە مەیل
لوا و مەشوەرەت کەردش وە لەیلێ
چەنی مادەرش تەعریف کەرد خەیلێ
جە ماڵ و مەسکەن، سەروەت و سامان
سپا و سان ئێڵ، عەبد و غوڵامان
ئەو جە ئەکابر خاسەی زەمانەن
مەشهوورەن نەعام، عومدەی ئەعیانەن
ساحێب حوسن خوڵق، عەقڵ و کەماڵەن
شەخسێ موئەددەب، ساحێب جەماڵەن
هیممەت عالییەن، با سەخاوەتەن
مەحموودول خیساڵ، پڕ زەکاوەتەن
«ذميم الاخلاقعەرەبی»، بەدسیرەت نییەن
بەخیل و بەدبەخت، بێغیرەت نییەن
ئاخر کناچێ مەکەرۆ شەوهەر
هەر پەی تۆ خاسەن، ئەی گران گەوهەر
من هەم قەوڵم دان، قەوڵم هەن ڕەواج
مەبۆ چەنی ئەو کەری ئیزدواج
لەیل دی موافیق نییەن غەڕەزەش
هیچ شەفا نییەن پەرێ مەرەزەش
پەی قەیس مەجنوون دڵش بی بوریان
کینەش ئەسەر کەرد ئاما وە گریان
قەبووڵش نەکەرد وەعدەی موستەعجەل
ئاخر کارش کەرد مەوکوول بە ئەجەل
واتش ئی کارە نەمەبۆ تەمام
مەکەران پەرێش جەهد و ئیهتیمام
ئەر ئەعزام وە تێغ پارە پارە بۆ
سەرم ئاوێزان پای قەنارە بۆ
ئی کارە ئاخەر نییەن ئیمەنی
ئەر سەد دۆستش بۆ، مەبۆ دوشمەنی
حەلقم حەلقاوێز حەڵقەی تەناف بۆ
سەد دەفعە بابۆم وەعدە خەلاف بۆ
قەبووڵم نییەن، خولاسەی کەلام
نە مەبۆم هامسەر پەی ئیبن سەلام
بابۆش تەعەسوب عەرەبیش جۆشا
چەمش جە ئینساف مرووەت پۆشا
پەی جیفەی دنیا جدد و جەهدش بی
کەی فکری فەرزەند وەفا و عەهدش بێ
حەمڵە بەرد پەی لەیل بە تێغ و بە کەف
جیرانان جەم بین، هامسایان سەف سەف
ناستن ئەو زەرەر بیاونۆ بە لەیل
واتن سەبرت بۆ، دەروونش هەن کەیل
فیعلەن خۆ لەیلێ جیسمەن بیمارەن
موحتاج وە تەبیب، دەوا و تیمارەن
وادەی وەقتێ تەر بدەرە وە سەعد
بشۆ وە یانە وێنەی بەرق و ڕەعد
بەڵ دمای شەفای بیماری لەیلی
ڕەزا بۆ بە ئەو جەڕای پڕ مەیلی
بابۆ و ئەدای لەیل بە ئەحسەن کەلام
وەی تەور جەواب دان وە ئیبن سەلام
فیعلەن مەریزەن کناچەی دڵبەر
جە دمای شەفاش مەکیانین خەبەر
غەیر جە تۆ داماد پەی هامسەری لەیل
قەبووڵمان نییەن بە ڕەزا و بە مەیل
ئەو ئیبن سەلام هۆر گێڵا وە پەس
تا مەکان وێش نەکێشا نەفەس
مونتەزیر ئەخبار جە باوان لەیل
مدرا شەو و ڕۆ بە ڕەزا و بە مەیل
جەی تەرەف لەیلێ بیمار و خەستە
بە وێنەی شاهین شاباڵ شکەستە
جەو تەرەف مەجنوون وێڵ بیابان
ڕەفیق وەحشی، شێت و شتابان
خەبەر خوتبە و خواستگاریی لەیل
یاوا پێش بەدتەر دەروونش بی کەیل
شێتی و مەجنوونی و دێوانەگی ئەو
شەیدایی و سەودای فەرزانەگیی ئەو
تەمامیجە نۆ یەکسەر کەرد تازە
بە بی نە جەهان، بی وە ئاوازە
ڕوو کەرد وە کێوان دەر و شاخ و داخ
بەڕ و بیابان گێڵا وە یاتاخ
چەنی وەحش و تەیر، مورغ مار و مۆر
مەکەردش ڕازان، شوور و تار و تۆر
خوداوەند وحووش پەی گەردش دام
مامان نە دەورش، مەگرتن ئارام
هەرچێ ئوموورات مەداشان ئەنجام
بێچارەی بەدبەخت، بێ ڕای بەدفەرجام
جە دوود دەروون نایرەی دوخان
خوشک بین وە ڕووی هەم پۆست و ئیستخوان
مووی سەرش ئاما ڕووی پەنجەش پۆشا
ناخونش چون شێر پەی جەنگ خرۆشا
زەعیف بی چون موو، ئەندامش باریک
جە سەختی مەینەت، ستارە تاریک
قەوم و ئەقرەبا دۆس و هامسایا
سۆزا قەلبشان پەی ئەو بێ مایە
وتن وە بابۆش خوداوەند جە سەر
ناڕازین بە وەزع ئی بەدبەخت پسەر
باوەرە وە لاش حەکیمی حازق
بەڵ عیلاجش بۆ فەرزەندەی سادق