لام وایە ڕۆزی نابارێ بۆ کەس
لە کتێبی:
دیوانی موفتی پێنجوێنی
بەرهەمی:
موفتی پێنجوێنی (1881-1952)
1 خولەک
591 بینین
لام وایە ڕۆزی نابارێ بۆ کەس
ئەسووڕێتەوە ئەم دەس بۆ ئەو دەس
یەکێ پێنج ساڵە خەریکی ڕەنجە
یەکێ تر ئەیبا بە زۆری پەنجە
یەکێ بە بەرماڵ یەکێ بە ماڵبڕ
یەکێ بە توربەی دەروێشی کەڵوڕ
یەک بە بەرماڵ، بە تەزبیح و ڕیش
ئەژی بەدایم بێ کار و بێ ئیش
یەکێ لە بەهار هەتاکوو پاییز
کاسبی ناکا نایدا بە ئازیز
تاکوو ئاغای دێ هەمووی بەش ئەکا
هەروەک برابەش لە دان و لە کا
یەکێ بە خەڵوە و چلەکێشانە
لە سەد لا بۆی دێ بەبێ پێوانە
یەکێ ڕێگرە و جەردەی سەرملان
چی بەر پەل کەوێ ئەیبا بە تاڵان
یەکێ خاوەنی جنۆکە و دێوە
بۆی دێ هەموو شت لە شار و دێوە
یەکێ بە دوعای ئەبوودووجانە
دینارێک ئەبا سەرقەڵەمانە
یەکێ بە گەز و مەتر و ترازوو
دەوڵەمەند ئەبێ بە زۆری بازوو
یەکێ بە مادەی قانوونی بەغداشوێن
بەشی خۆی ئەبا بە سات و سەودا
یەکێ بە زەرگ و شمشێر و کەشکۆڵ
کۆی ئەکاتەوە بە بار و بە کۆڵ
بەڕاستی ڕۆژی عەرەق ڕێژانە
بەرهەمهێنانی باخ و بێستانە
جووت و فەلاحی و عەرزکێڵانە
ڕۆژی کە وا بوو پوخت و جوانە