وەڵامی خانا بۆ میرزا شەفیع
لە کتێبی:
دیوانی خانای قوبادی
بەرهەمی:
خانای قوبادی (1704-1778)
3 خولەک
969 بینین
میرزام جە پیری، میرزام جە پیری
پەی چێش سکاڵات بەرزەن جە پیری
نیسبەت زوڵمەت دای، بە نام پیری
ئەعلا مەقامەن، مەقام پیری
هەرچەند کە پایەی پیری زەحمەتەن
ئەمانەتبەخشی مایەی ڕەحمەتەن
بە قەوڵ بەدان، هەرزەی زەمانە
خاترت خەمەن، لێت مەدان تانە
وەی تەورە ئەدووی جە زوڵم پیری
میرزام تۆ زانا و ساحێب تەدبیری
ساحێب فام و فەزڵ، دانا و هوشیاری
بە عەقڵ و ئەدەب، جە عام دیاری
بشۆ وەفام دا، دەورەی پێشینان
تاریخ و کردار، ئەو نازک بینان
باوەر بە نەزەر ئادەم تا خاتەم
جە فەزڵ پیری خاتر بکەر جەم
ئەر پیری عەیبەن زات زولجەلال
ئادەم و حەوا بێ حوزن و مەلال
ویاران دەوران زیندەگی فاخر
هەزار ساڵ تەمام، ئەوەڵ تا ئاخر
هەم حەزرەتی نووح هەزار ساڵ تەمام
نەبوەتش کەردەن، بە سەد ئیهتمام
ئیبراهیم خەلیل، جەی دنیای فانی
وە پیری بەرشی ، تۆ وێت مەزانی
وەڕیش سفید ئیفتیخار کەردەن
لەقەب شێخولـــئەنبیا بەردەن
ئیسحاق و یەعقووب، هەر دوو تەمام پیر
دوو بابۆ و فەرزەند، شێخان کەبیر
تا چەن پێغەمبەر وە پیری مەردەن
تەشریف وە بەهەشت هەشتۆمین بەردەن
مەجلیس شاهان بێ پیر نمەبۆ
پێشڕەفت ئوموور، تەدبیر نمەبۆ
سالیکان ڕای خوواپەرەستی
ڕاهنمای سیڕات ڕاستی و دروستی
کەردەن ئیختیار لەقەب پیری
تۆ پەی چێش جە دەس پیری زویری
کاوەی ئاهنگەر پیر ساحێب فەڕ
وە تەدبیر ئاوەرد ، فەرەیدوون فەڕ
زاڵ سام یەڵ تەدبیر شاهان
کەیانی بەو پەی حوشمەت پەناهان
خسووس پەی ڕۆستەم شای نامئاوەران
نە جەنگ هەفت خوان ڕای مازیندەران
هەم پەرێ نەبەرد ، شای ئەسفەندیار
غاڵب بی بە قەوڵ ، ئەو مەرد هۆشیار
جە تووران پیران ، پیر خیرەدمەند
بە تەدبیر سوپای ئێران جە بن کەند
ئاسەف دەوران پیر ساحێب دین
وە تەدبیر ئەو پەیدا بی نگین
ئەوسا سولەیمان بێ خۆف و ئەندێش
سەخری جینیش کوشت، نیشت نە تەخت وێش
عەدڵ نەوشیروان ، جە عام مەشهوورەن
هەرچەن کافر بی ، گوناش مەغفوورەن
سەبەبش تەدبیر ئەبووزەڕ جە میر
مەشهوورەن نە عام ، چون ماهـ مونیر
پیری ڕاهنوما ڕاگەی دینتەن
پیری ئابڕووی سەرزەمینتەن
پیری ڕای بەدی قبووڵ نەکەردەن
ڕاهنمایی حەقق تا وە ڕۆی مەردەن
پیری هەر بە لوتف خاسەی ئیلاهین
نەک بە زۆر و زەڕ خاترخواهین
کەوا بوو ئەو پیر ، حەقیقەت پیر بۆ
واتەش وێنەی نەقش نە دڵ جاگیر بۆ
بەو شەرتە پیری عاقیبەت خەیر بۆ
ڕووی قەلبش وە لای سلووکی سەیر بۆ
تۆ وێت جە پیری ئەفزەڵ و ئەدەب
بە دەست ئاوەردی شەخسێ موئەددەب
جەوانی چێشەن ؟ تۆ وێت مەزانی
مەگێرۆ نەوەر ڕاگەی نادانی
ڕەند و عاشقی مەستی و مەغرووری
دەردی مەعسییەت ، جە خوا دووری
جە ڕای ئاخیرەت مەست و بێ خەبەر
ڕای ئاشووب و شەڕ گرتەنش نەوەر
شەفیعکەس شیفتە، برای هامفەردم
گۆش دەر وە موفاد خاتیمەی دەردم
حەیفەن پەی تۆ چون ، زی فەزڵ فەزڵان
حەزین بۆ جە دەس بەعزێ بەدئەسڵان
خاناناسناوی ئەدەبی چون تۆ پیر ، تۆ پیر چون خانا
هەر دوو خاک پای پیران دانا