wełamî xana bo mîrza şefî’
From the Book:
Dîwanî Xanay Qubadî
By:
Khana Qubadi (1704-1778)
3 minutes
971 views
mîrzam ce pîrî, mîrzam ce pîrî
pey çêş sikałat berzen ce pîrî
nîsbet zułmet day, be nam pîrî
e’la meqamen, meqam pîrî
herçend ke payey pîrî zeḧmeten
emanetbexşî mayey řeḧmeten
be qewł bedan, herzey zemane
xatirit xemen, lêt medan tane
wey tewre edûy ce zułim pîrî
mîrzam to zana û saḧêb tedbîrî
saḧêb fam û feził, dana û huşyarî
be ’eqił û edeb, ce ’am dyarî
bişo wefam da, dewrey pêşînan
tarîx û kirdar, ew nazk bînan
bawer be nezer adem ta xatem
ce feził pîrî xatir biker cem
er pîrî ’eyben zat zulcelal
adem û ḧewa bê ḧuzin û melal
wiyaran dewran zîndegî faxir
hezar sał temam, eweł ta axir
hem ḧezretî nûḧ hezar sał temam
nebwetiş kerden, be sed îhtimam
îbrahîm xelîl, cey dinyay fanî
we pîrî berşî , to wêt mezanî
weřîş sifîd îftîxar kerden
leqeb şêxul’enbya berden
îsḧaq û ye’qûb, her dû temam pîr
dû babo û ferzend, şêxan kebîr
ta çen pêẍember we pîrî merden
teşrîf we beheşt heştomîn berden
meclîs şahan bê pîr nimebo
pêşřefit umûr, tedbîr nimebo
salîkan řay xuwaperestî
řahnimay sîřat řastî û dirustî
kerden îxtyar leqeb pîrî
to pey çêş ce des pîrî zwîrî
kawey ahniger pîr saḧêb feř
we tedbîr awerd , fereydûn feř
zał sam yeł tedbîr şahan
keyanî bew pey ḧuşmet penahan
xisûs pey řostem şay nam’aweran
ne ceng hefit xwan řay mazînderan
hem perê neberd , şay esfendyar
ẍałb bî be qewł , ew merd hoşyar
ce tûran pîran , pîr xîredmend
be tedbîr supay êran ce bin kend
asef dewran pîr saḧêb dîn
we tedbîr ew peyda bî nigîn
ewsa suleyman bê xof û endêş
sexrî cînîş kuşt, nîşt ne text wêş
’edił newşîrwan , ce ’am meşhûren
herçen kafir bî , gunaş meẍfûren
sebebiş tedbîr ebûzeř ce mîr
meşhûren ne ’am , çun mah munîr
pîrî řahnuma řagey dînten
pîrî abřûy serzemînten
pîrî řay bedî qibûł nekerden
řahnimayî ḧeqiq ta we řoy merden
pîrî her be lutif xasey îlahîn
nek be zor û zeř xatirxiwahîn
kewa bû ew pîr , ḧeqîqet pîr bo
wateş wêney neqiş ne dił cagîr bo
bew şerte pîrî ’aqîbet xeyr bo
řûy qelbiş we lay silûkî seyr bo
to wêt ce pîrî efzeł û edeb
be dest awerdî şexsê mu’eddeb
cewanî çêşen ? to wêt mezanî
megêro newer řagey nadanî
řend û ’aşiqî mestî û meẍrûrî
derdî me’sîyet , ce xwa dûrî
ce řay axîret mest û bê xeber
řay aşûb û şeř girtenş newer
şefî’Person şîfte, biray hamferdim
goş der we mufad xatîmey derdim
ḧeyfen pey to çun , zî feził fezłan
ḧezîn bo ce des be’zê bed’esłan
xanaPen name çun to pîr , to pîr çun xana
her dû xak pay pîran dana