وەلاڵ نمەبۆ
لە کتێبی:
دیوانی خانای قوبادی
بەرهەمی:
خانای قوبادی (1704-1778)
5 خولەک
1248 بینین
وەلاڵ نمەبۆ، وەلاڵ نمەبۆ
سیاسەنگ هەرگیز وەلاڵ نمەبۆ
ئەتڵەس و خارا، وە شاڵ نمەبۆ
ئەبڵە وە خەیاڵ، وە ماڵ نمەبۆ
گوڵ غونچەی گوڵان، بێ خارنمەبۆ
یاری بێ بەینەت، وە یارنمەبۆ
ناقابیل هەرگیز قابیل نمەبۆ
خاسی جە ناکەس، حاسڵ نمەبۆ
یەکڕەنگان دەور، دووڕەنگ نمەبۆ
دۆستی و موحەببەت، وە جەنگ نمەبۆ
ئەسیڵ و نەجیب، ناکەس نمەبۆ
بەدئەسڵ و ناکەس، وە کەس نمەبۆ
قومری و قاژە و قووش، قەقنووس نمەبۆ
بولبول وە توتی و کەرکەس نمەبۆ
ڕوبا موبارێز، پەی شێر نمەبۆ
دێوانە دانا، حیز ژێر نمەبۆ
جە موردار نافەی تەتار نمەبۆ
دەبباغی، دووکان عەتتار نمەبۆ
دانشمەند هەرگیز، فانی نمەبۆ
پیری چون ئاما، جوانی نمەبۆ
هونەرمەند هەرگیز کەم چیز نمەبۆ
خواتەرس هیچ وەخت خوونڕێز نمەبۆ
زاهید هیچ وەختێ، غەمبار نمەبۆ
بێئەسڵ و نەسەب تەییار نمەبۆ
دز و درۆزن، سادق نمەبۆ
فاڵگیر وە حەکیم حازق نمەبۆ
مورشید بێعیلم، وە پیر نمەبۆ
ئەمانەت فەرزەن، دەستگیر نمەبۆ
سۆفی وە حەی حەی، دڵساف نمەبۆ
مەردی و شوجاعەت، وە لاف نمەبۆ
دەروێشی وە پرچ، وە دەف نمەبۆ
ئەڵماس وە ڕەفیق، خەزەف نمەبۆ
شێخی وە شونیل کەڵپۆس نمەبۆ
عاشق بە نەعرەی یا دۆس نمەبۆ
سەڵتەنەت وە زوڵم، وە جەور نمەبۆ
قەزاوەت وە خوڵق، بەدتەور نمەبۆ
بزورگی بێ سەرف نەزەر نمەبۆ
پووڵ، ڕاحەت جە ڕاگوزەر نمەبۆ
عالمی بەداد، بەقاڵ نمەبۆ
بێتەحسیل عیلم، چەند ساڵ نمەبۆ
بێ پەیرەوی شەرع، ئیسلام نمەبۆ
حەڵاڵ وە هامتای حەرام نمەبۆ
عادڵ هیچ وەختێ گومنام نمەبۆ
نیکوکار هیچ وەخت بەدنام نمەبۆ
زاڵم وە هامتەرز عادڵ نمەبۆ
سەفیهـ وە هامڕاز عاقڵ نمەبۆ
مەستی و مەدهۆشی، وەکار نمەبۆ
زاڵم سەفیهـ ، هۆشیار نمەبۆ
قومارباز هەرگیز، ماڵدار نمەبۆ
بێ پەڕوپۆ، مورغ، باڵدار نمەبۆ
فیتنە و قسەی بەد، وە دۆس نمەبۆ
بێوەی بەدفەڕجام، عەرووس نمەبۆ
زاڵمزادە شەخس، عادڵ نمەبۆ
بەین ساحێب شەرت، باتڵ نمەبۆ
خەرموورەفرۆش، لاڵناس نمەبۆ
شیشە و ڕەفیق ئەڵماس نمەبۆ
ڕوبا وە سنجاب، سەموور نمەبۆ
بوڵەندی و ئیقباڵ، وە زوور نمەبۆ
نامەرد وە گەزاف، وە مەرد نمەبۆ
هیچ ئادەمیزاد، بێدەرد نمەبۆ
مەینەت دونیا، هیچ کەم نمەبۆ
دڵ ئەگەر سەنگ بۆ، بێغەم نمەبۆ
بەزم بزورگان، بێساز نمەبۆ
نازداران تا سەر، وە ناز نمەبۆ
ئەشرەفی هەرگیز وە خاک نمەبۆ
خانەی گومانان، دڵپاک نمەبۆ
ڕاستی جە ژەنان، مەیسەر نمەبۆ
وەفاشان پەی کەس تا سەر نمەبۆ
تەڕیدە تا سەر، ئازاد نمەبۆ
مایەی حەرامی، زیاد نمەبۆ
دوشمنی ئەیلات، عەبەس نمەبۆ
شیشەی شکەستە پەیوەس نمەبۆ
کاسبیی حەڵاڵ، بەرباد نمەبۆ
هەم کەسب حەرام، زیاد نمەبۆ
سەرحەد نشینان، بێخۆف نمەبۆ
کوێستان بێبەرف، بێتۆف نمەبۆ
زاڵم وە مەحبووب بێچوون نمەبۆ
هەم مەزڵووم تا سەر، زەبوون نمەبۆ
سکەی قەڵب هەرگیز ڕەواج نمەبۆ
ناکەس وە تەوبیخ، عیلاج نمەبۆ
دەوڵەتمەند هەرگیز، بێفەڕ نمەبۆ
هەم مەرد سەخی، دەسبڕ نمەبۆ
بەخیل و حەسوود، مەشهوور نمەبۆ
بەخشەندە و دڵپاک، مەقهوور نمەبۆ
پاک و خوڵاسە، ناپاک نمەبۆ
مونعیم هیچ وەختێ، غەمناک نمەبۆ
گوفتار وە بێ پووڵ، قەبووڵ نمەبۆ
نان جە لای مەڵڵا، وسووڵ نمەبۆ
ئاغە وە بابۆی نۆکەر نمەبۆ
عاتیفە و ڕەعیەت تا سەر نمەبۆ
بەدتەور جە بەدی، تەفریق نمەبۆ
تا سەر چەنی کەس، شەفیق نمەبۆ
جە لای نۆ، کیسە، تامڵ نمەبۆ
مەرد کەلـلەدێز، عاقڵ نمەبۆ
خاس بە واتەی بەد، وە بەد نمەبۆ
قاڵی وە هامتای نمەد نمەبۆ
هەرزەکەلامان خامۆش نمەبۆ
عەیبجۆ، سوخەنچین، سڕپۆش نمەبۆ
نامەڵاح هەچ وەخت، غەوواس نمەبۆ
هەورێشم وە پۆی پەڵاس نمەبۆ
ئەسڵ و نەسەب خاس، بەدنام نمەبۆ
ئادەمی عاقڵ، نەفام نمەبۆ
ڕەفیق عەقرەب، بێ نێش نمەبۆ
بێگانە هەرگێز، وە خێش نمەبۆ
گوڵ بێ خار، ئاگر بێ دوود نمەبۆ
سەرمایەی حەڵاڵ، بێسوود نمەبۆ
خاس وە بێ خراو، قەدرش نمەبۆ
تا هیلال نەبۆ، بەدرش نمەبۆ
بەهار بێ باران، وە فەڕ نمەبۆ
ئاهەن، پۆڵا و مس وە زەڕ نمەبۆ
ئاینەی ڕەوشەن، وە ساج نمەبۆ
باغە و شێر مایەی وە عاج نمەبۆ
ناخەڵەف جادار سەلەف نمەبۆ
هەر قەترە جادار، سەدەف نمەبۆ
مەرد نامەرد، نامەرد، وە مەرد نمەبۆ
تاق وە جفت زەوج هەمفەرد نمەبۆ
شەخسێ شکەمدۆس، بێدەرد نمەبۆ
ڕاسگۆ جە دارەین، ڕەنگ زەرد نمەبۆ
کەمخۆر هیچ موحتاج دەوا نمەبۆ
پەڕخۆری دەروون دەوا نمەبۆ
خانا بێ پەند و ئەندەرز نمەبۆ
پەندش شیرینتەر جەی تەرز نمەبۆ
هەر مەردیش بێچەم، بێگۆش نمەبۆ
جە واتەی خانا، خامۆش نمەبۆ