welał nimebo
Li pirtûka:
Dîwanî Xanay Qubadî
Berhema:
Xanayê Qubadî (1704-1778)
5 Xulek
939 Dîtin
welał nimebo, welał nimebo
syaseng hergîz welał nimebo
etłes û xara, we şał nimebo
ebłe we xeyał, we mał nimebo
guł ẍunçey gułan, bê xarnimebo
yarî bê beynet, we yarnimebo
naqabîl hergîz qabîl nimebo
xasî ce nakes, ḧasił nimebo
yekřengan dewr, dûřeng nimebo
dostî û muḧebbet, we ceng nimebo
esîł û necîb, nakes nimebo
bed’esił û nakes, we kes nimebo
qumrî û qaje û qûş, qeqnûs nimebo
bulbul we tutî û kerkes nimebo
řuba mubarêz, pey şêr nimebo
dêwane dana, ḧîz jêr nimebo
ce murdar nafey tetar nimebo
debbaẍî, dûkan ’ettar nimebo
danşimend hergîz, fanî nimebo
pîrî çun ama, cwanî nimebo
hunermend hergîz kem çîz nimebo
xwaters hîç wext xûnřêz nimebo
zahîd hîç wextê, ẍembar nimebo
bê’esił û neseb teyyar nimebo
diz û dirozin, sadiq nimebo
fałgîr we ḧekîm ḧazq nimebo
murşîd bê’îlim, we pîr nimebo
emanet ferzen, destigîr nimebo
sofî we ḧey ḧey, diłsaf nimebo
merdî û şuca’et, we laf nimebo
derwêşî we pirç, we def nimebo
ełmas we řefîq, xezef nimebo
şêxî we şunîl kełpos nimebo
’aşiq be ne’rey ya dos nimebo
sełtenet we zułim, we cewr nimebo
qezawet we xułq, bedtewr nimebo
bizurgî bê serf nezer nimebo
pûł, řaḧet ce řaguzer nimebo
’almî bedad, beqał nimebo
bêteḧsîl ’îlim, çend sał nimebo
bê peyrewî şer’, îslam nimebo
ḧełał we hamtay ḧeram nimebo
’adił hîç wextê gumnam nimebo
nîkukar hîç wext bednam nimebo
załim we hamterz ’adił nimebo
sefîh we hamřaz ’aqił nimebo
mestî û medhoşî, wekar nimebo
załim sefîh , hoşyar nimebo
qumarbaz hergîz, małdar nimebo
bê peřupo, murẍ, bałdar nimebo
fîtne û qisey bed, we dos nimebo
bêwey bedfeřcam, ’erûs nimebo
załimzade şexis, ’adił nimebo
beyn saḧêb şerit, batił nimebo
xermûrefroş, lałnas nimebo
şîşe û řefîq ełmas nimebo
řuba we sincab, semûr nimebo
bułendî û îqbał, we zûr nimebo
namerd we gezaf, we merd nimebo
hîç ademîzad, bêderd nimebo
meynet dunya, hîç kem nimebo
dił eger seng bo, bêẍem nimebo
bezim bizurgan, bêsaz nimebo
nazdaran ta ser, we naz nimebo
eşrefî hergîz we xak nimebo
xaney gumanan, diłpak nimebo
řastî ce jenan, meyser nimebo
wefaşan pey kes ta ser nimebo
teřîde ta ser, azad nimebo
mayey ḧeramî, zyad nimebo
duşminî eylat, ’ebes nimebo
şîşey şikeste peywes nimebo
kasbîy ḧełał, berbad nimebo
hem kesb ḧeram, zyad nimebo
serḧed nişînan, bêxof nimebo
kwêstan bêberf, bêtof nimebo
załim we meḧbûb bêçûn nimebo
hem mezłûm ta ser, zebûn nimebo
sikey qełb hergîz řewac nimebo
nakes we tewbîx, ’îlac nimebo
dewłetmend hergîz, bêfeř nimebo
hem merd sexî, desbiř nimebo
bexîl û ḧesûd, meşhûr nimebo
bexşende û diłpak, meqhûr nimebo
pak û xułase, napak nimebo
mun’îm hîç wextê, ẍemnak nimebo
guftar we bê pûł, qebûł nimebo
nan ce lay mełła, wisûł nimebo
aẍe we baboy noker nimebo
’atîfe û ře’yet ta ser nimebo
bedtewr ce bedî, tefrîq nimebo
ta ser çenî kes, şefîq nimebo
ce lay no, kîse, tamił nimebo
merd kelledêz, ’aqił nimebo
xas be watey bed, we bed nimebo
qałî we hamtay nimed nimebo
herzekelaman xamoş nimebo
’eybico, suxençîn, siřpoş nimebo
namełaḧ heç wext, ẍewwas nimebo
hewrêşim we poy pełas nimebo
esił û neseb xas, bednam nimebo
ademî ’aqił, nefam nimebo
řefîq ’eqreb, bê nêş nimebo
bêgane hergêz, we xêş nimebo
guł bê xar, agir bê dûd nimebo
sermayey ḧełał, bêsûd nimebo
xas we bê xiraw, qedirş nimebo
ta hîlal nebo, bedirş nimebo
behar bê baran, we feř nimebo
ahen, poła û mis we zeř nimebo
ayney řewşen, we sac nimebo
baẍe û şêr mayey we ’ac nimebo
naxełef cadar selef nimebo
her qetre cadar, sedef nimebo
merd namerd, namerd, we merd nimebo
taq we cifit zewc hemferd nimebo
şexsê şikemdos, bêderd nimebo
řasgo ce dareyn, řeng zerd nimebo
kemxor hîç muḧtac dewa nimebo
peřxorî derûn dewa nimebo
xana bê pend û enderz nimebo
pendiş şîrînter cey terz nimebo
her merdîş bêçem, bêgoş nimebo
ce watey xana, xamoş nimebo