ئەم و ئەو
لە کتێبی:
دیوانی حەقیقی
بەرهەمی:
حەقیقی (1902-1996)
1 خولەک
841 بینین
برایەک پرسی ڕۆژێکی لە من
کام شاعیرترن هەژارکەس و هێمنکەس؟
گوتم «اعوذعەرەبی» لە شەڕڕی وەسواس
هەر دوو یەکێکن لە لای کاکەباس
هەر دوو ئەنگێوەن لە یەک هەدەفدا
هەر دوو وەک دوڕن لە یەک سەدەفدا
هەر دوو مامۆستای لۆمە لەوانن
لە بەحری تانان وەک مەلەوانن
ئەو وەردەگێڕێ واژەی جزیریکەس
ئەم نەقڵان دەکا لە شکسپیریکەس
بۆ کوردوستانی ئەو بێ وێنەیە
تاریک و ڕوونی ئەم ئاوێنەیە
ئەوین بەزێنە بەیتی مەم و زێن
لای هەواری ئەم لەیل و مەجرووم کێن
خەییامی کوردی چەنگی لە دڵ دا
ناڵەی جودایی گڕی بە کڵ دا
لە کوێستانی ئەو گوڵان بە بۆ کە
سەمەن وەکۆ کە لەو پاشەرۆکە
خولاسەی کەلام ئەوان برامن
ناکەم فەڕقیان بە موو، برا، من
منیش چاوێکم لە دیتن وێستا
هەر دوو بە چاوێک دەبینم ئێستا