شۆخی موکریان
لە کتێبی:
دیوانی حەقیقی
بەرهەمی:
حەقیقی (1902-1996)
2 خولەک
692 بینین
لە جێی فرمێسکی سوێر ئەمشەو دەبارێ خوێن لە چاوانم
لە دووری یارە باڵابەرزەکەی شۆخی موکریانم
بریسکەی دا لە مەغریب تەلعەتی ڕۆژی بەرەو مەشریق
قیامەت ڕابووە ئەوڕۆ خودا تۆبە پەشیمانم
بە هەستانی لە خەو تاریکەشەو لاچوو بەیان بەربوو
دەڵێن زولفی پەرێشانی وەلادا ماهی تابانم
سیا پەردەی شەوی لادا تەلیعەی سووڕەتی شەمسی
قەمەر دەرچوو لە عەقڕەب پەرچەمی باداوە جانانم
نیگای چاوی خوماری کوشتمی کوا شاهیدی عادڵ
ئیشارەی چاوی مەستی پێم دەڵێ بێ سووچ و تاوانم
شەوی هیجری کە سامانی نەبوو ڕۆژی قیامەت بوو
بەیانی دیم نە دڵ مابوو نە سەر مابوو نە سامانم
نەسیم ئەنگووت و گوڵ پشکووت و بولبول هەر چریکەی دێ
زەکاتی حوسنە ئاواتی، دەزانێ سوورە خرمانم
لە لای باغی گوڵان ئەوڕۆ نەسیمی عوود و عەنبەر دێ
خەریکی گوڵ چنین بن ڕەنگە دەستەی گوڵ عوزارانم
گوڵ و سەرو و سەمەن وەک شۆڕەبی بێ بۆن و سەر شۆڕن
لە حاندی نەوگوڵم هێزی دڵم سەروی خەرامانم
قەدی سەروە و مەمی نارە چەمی نەرگیس دەمی خونچە
لە بن لێوانەوە لێوی دەڵێ لەعلی بەدەخشانم
تکەی عارەق لە سەر کوڵمی بە عەینی شەونمی سەر گوڵ
دەم و لێوی دەڵێ بڕوانە من خونچێکی خەندانم
دەپرسێ چاوی مەخمووری «حەقیقیناسناوی ئەدەبی» چۆنە ئەحواڵت؟
بە نەشئەی چاوەکانت چاوەکەم سەرمەستی مەستانم