فیز و لەخۆ بایی بوون
لە کتێبی:
دیوانی فایق بێکەس
بەرهەمی:
فایق بێکەس (1905-1948)
1 خولەک
903 بینین
عومرێکی توڕڕەهاتە
بێ کەڵک و بێ سەباتە
ئاخری قەبری تەنگە
ئەوی کە لۆرت و لاتە
***
دنیایەکی بەڵایە
پڕ دەرد و پڕ جەفایە
هانایە پێوە بایی
مەبن، بەخوا خەتایە
***
نە موسای پێغەمبەر
دەوامی بوو هەتا سەر
نە دارا و نە ئەسکەندەر
نە تەخت و بەختی قەیسەر
***
خەوێکی کورت و تاڵە
بێ فائیدە و بەتاڵە
شریتی سینەمایە
کاکە هەروەک خەیاڵە
***
چەند خانەدان بەسەر چوو
چەند نازەنینی خۆش ڕوو
لەژێر ئەم خاکە بوونە
خۆراکی مار و مێروو
***
بۆ وا بەلار و لەنجە
ئەڕۆی بە نووکی پەنجە
تێ بفکرە لەژێر پێت
هەر گۆڕی پێیی گەنجە
***
زۆر عەیبە دەعیە لێدان
بەسەر ئێسقانی ئینسان
گەر ئەتوانی بەدەعیە
بفڕە بچۆرە ئاسمان...