وە یادی ساڵان
لە کتێبی:
دیوانی سەیدی
بەرهەمی:
سەیدی (1785-1849)
3 خولەک
1068 بینین
وە یادی ساڵان، وە یادی ساڵان
دڵە تۆ بە یاد ویەردەی ساڵان
وەس نیشە خەمناک چەنی خەیاڵان
با بشمێ وە سەیر بارگەی «عەوداڵان»
کۆمای خەرمانان خەم دانت وە هەم
نیشتەنی جەلاش پەژارە و ماتەم
بای شەماڵ نیەن بدەیش وە باوە
تاکەی سەرگەردان مەبیش وەلاوە
عەوداڵان بەرزەن، شەماڵش تێزەن
نەسیمش بۆی عەتر عەنبەر ئامێزەن
با کۆگای خەمان هۆرگێرمێ بە کۆڵ
بەرمێش وە کۆی بەرز عەوداڵانی چۆڵ
چەوگە ئێمە و تۆ هەردوێما بە هەم
بدەیمێش وە باد، بە «کەم» کەرمێش کەم
دڵە تۆ سادار دێوانەی وێڵی
جانشینی قەیس بیابان گێڵی
نیشتەیت بێ سوودەن جە ماڵانەوە
با بشمێ وە کۆی عەوداڵانەوە
ئەر پەی وایەی دڵ وەر پەی سەوابەن
سەیری عەوداڵان پەی ئێمە بابەن
سەیری سەر بەرزان گەشتی سەر کاوان
شادی خەمانەن، ڕۆشنی چاوان
سا با ڕاگەی چۆڵ بگێرمێ نە وەر
تەی کەرمێ هەردان، کەش و کۆو کەمەر
جە هیچ مەنزڵێ نەگێرمێ قەرار
تا بشمێ وەبان پای دامانی غار
وەبانی ئەو تەخت حاجەت نما کەین
پەی وایەی موراد دەست بە دۆعا کەین
بشمێ نە ئەیوان غاری هەیبەتناک
تەکیەگای خاسان ئەوداڵانی پاک
دوو دەست پەی دۆعا هۆردارمێ گوشاد
«یا حیّ»، «یا قیّوم»، دەهندەی موراد
بە عەشقی ڕەسوول شای «یڤرب» مەقام
بە شەوق و نووری ئەسحابان تەمام
بە عەشقی بازووی درازی «حەیدەر»
زۆر ئەرمانای دەرب دەروازەی «خەیبەر»
بە عەشقی خاسان دڵپاکانی ساف
نەڕووی سەرزەمین جە قاف هەرتا قاف
«یا رجال الغَیب»، یا هەفت عەوداڵان
جە کۆی «پیر ڕۆسەم»، هەم جە «کۆساڵان»
یا ئەوداڵ فەریاد، نامت مەشهوورەن
هیممەت یار کەری کار بە زەروورەن
سەودای عەشقی یار ها نە کەللەمدا
وستەناش نە گێج دەریای ماتەمدا
خەریکی خەمنا، خەم خەڵاتەنان
دوور جە یار کەفتە، کش و ماتەنان
زام زەدەی دەوران هیجرانی یارم
سەد عوقدە پەرێش کەفتەن نە کارم
چونکە بەد ئیقباڵ سیا ستارەم
سەنگی بەدبەختی نەخشەن نە چارەم
ئەر بشوون وەلای ئەفلاتوونی ژیر
پەی دەوای دەردم ئاد مەوەرۆ گیر
ماچۆ تۆ بە عەشق سەد پارە جەرگەن
دەوای دەردی تۆ وەسڵەن یا مەرگەن
یا شاهی شاهان، یا حەیی خاسان
ئاسان کەی کارم بە دەستی ئاسان
هەر من بێ چارەم یاڵڵا چارم کەی
خاتر شاد بە وەسڵ باڵای یارم کەی
ئارەزووی دڵان یەکسەر حاسڵ کەی
دۆست بە دۆستی وێش بە خەیر واسڵ کەی
سەیدیناسناوی ئەدەبی دڵ پوڕ ئێش، جگەر پوڕ زامین
«يا اللهعەرەبی» دۆعاش قبووڵ کەی، ئامین