سوورە هەراڵە
لە کتێبی:
دیوانی سەیدی
بەرهەمی:
سەیدی (1785-1849)
2 خولەک
1118 بینین
سوورە هەراڵە، سوورە هەراڵە
سوورە هەراڵە، وەش کەیفی حاڵە
پەی چێش ڕەنگی تۆ هەر سوور دیارەن؟
ڕەنگت چوون یاران وەک شای وەهارەن
وەختێ ئێد شنەفت سوورە هەراڵە
واتش ڕەنگی من وەش کەیفی حاڵە
«دایمُ الاَوْقات» جە وەتەن و وێم
نیشتەناو خەریک شەوق و زەوقی وێم
نەپای «وەرواوان» وەختێو من مەو بەر
ڕەنگەم سەوزەنە نەڕووی «وەرکەمەر»
ئینجا جە ناگا سەیر کەرو جە دوور
دیارەن باڵاو یارەکەیم چوون نوور
وەختێو ئا یارە نزیکم مەبۆ
لاو سەرەیمەنە تێر سەیرم کەرۆ
بوێ و وەشە مەگنۆ نە سەرەم
ڕەنگەم سوورە بۆ زوو بە خاتر جەم
پی ڕەنگە ڕەنگم بە سوور دیارەن
سووری ڕەنگی من جە سایەی یارەن
کەچی جە ناگاهـ چەرخی پوڕ ستەم
من و ئازیزش جیا کەرد جە هەم
هۆرێزا لوا پەرێ یانەی وێش
منش کەرد بێ ناز، خاتریش پەرێش
ڕەنگەم هۆر گێڵا جە ڕەنگی وەڵین
دڵم ماتەم بی، بێزارو خەمگین
گرەوام فرە جە داخی گەردوون
هەرسۆ چەماو من جە حیساب بێروون
پاسە زانێنێ یاری وەفا دار
ئەر دووریش گنۆ مەگێروو قەرار
کە ئادە لوا بەبێ بەهانە
هەرسۆ چەماو من ئاما چوون هانە
سەیدیناسناوی ئەدەبی خۆ جە داخ بێ وەفایی یار
چی سەرزەمینە نیەنش قەرار