دڵ ناڵانشەن
لە کتێبی:
دیوانی سەیدی
بەرهەمی:
سەیدی (1785-1849)
2 خولەک
1106 بینین
دڵ ناڵانشەن، دڵ ناڵانشەن
هامسەران جە دەرد، دڵ ناڵانشەن
زویریش جە تاو خەیاڵانشەن
ئارەزوی تەواف عەوداڵانشەن
جە دووری یاران بێ قەراریمەن
واوەیلاوو حەشر، شین و زاریمەن
ئارەزووم کەردەن چوون قەدیم ساڵان
بشوون پەی تەواف بارگەی «عەوداڵان»
بە دڵەی غەمناک نامرادەوە
بە دەرون غەمبار خەم بە بادەوە
فەسڵی گوڵ گەشتەن، وادەی گوڵانەن
عەترشان دەوای دەردی دڵانەن
ئێمە و دڵ هەردوو، بە زاری و لاڵان
با بشمێ وە سەیر بارگەی عەوداڵان
پەی دیدارشان گەرمی تاسەمەن
سەر زەمین گرتەن، دووی هەناسەمەن
«پیر ڕۆستەم» وێران، کەس نیەن تێشدا
وێرانیش مەدۆ جەرگم بە نێشدا
«شەوبۆ»ش نیلی پۆش، خەمگین دیارەن
«چنوور»ش پەشێو، چوون زوڵفی یارەن
سەربەرزان، هەردان، عەوداڵان تارەن
سەیرش پەی یاران چوون ژەهری مارەن
با بە دۆعای خەیر یاران کەرمێ شاد
خاسی عەوداڵان باوەرمێ وەیاد
هەر هەفت عەوداڵان بگێرمێ دامان
بەڵکم بیاوان یاران وەلامان
یا هەفت عەوداڵان دڵ پاکی دڵ ساف
نامتان مەشهوورەن جە قاف تا بە قاف
ساکنانی غار، کۆی بەرزو بوڵەند
دۆعا مەقبوڵان بارگەی خوداوەند
وە بەرزی ئەو کۆ بەرز بۆ پایەتان
بە دایم پەیمان مەنۆ سایەتان
سەیدیناسناوی ئەدەبی شەرتش بۆ چوون وەفا داران
بەیۆ پەی تەواف بارگەی عەوداڵان