لە ئێستاوە

قوربانی چاوەکانت بم
لە ئێستاوە
وەک دوو زەریای،
پانوبەرین
گەمەی خەمی
گشت جیهانیان
تیا وەستاوە
کچە شیرینەکەی بابە
لە ئێستاوە
لە دەروازەی ژیانتا
هەزارەها مۆتەکەی،
قەبە و ناشرین
ڕاوەستاوە
کەچی ڕووباری ژینی تۆ
نەوەستاوە.
لە ئێستاوە
پێشمەرگەیەکی بەرگری
دڕندە چەکدارەکانی
کووچەکانی سلێمانی
کە دەبینی
تەعیان دەکەی.
قوربانی دەستوپەنجەت بم
قوربانی دەمی ئەوەش بم
کە وشەی «تەع»ی
داهانی.