مریشک ئەچێتە جێیە چینەی بێ
لە کتێبی:
پەندەکانی پیرەمێرد
بەرهەمی:
پیرەمێرد (1867-1950)
1 خولەک
759 بینین
مریشک ئەچێتە جێیە چینەی بێ
ناچێتە جێیە کەوا چی نەبێ
ماڵ لێی نەبەخشی کەمتر بەرئەگرێ
مێو کە نەیبڕی کەمتر بەر ئەگرێ
ئاو بەری گیرا پەنگ ئەخواتەوە
ڕایی بێ ڕێبوار لێی ئەخواتەوە
ئەوەی بە پارە لە خۆی بایی بێ
بایییە هەر چەند ملیۆن بایی بێ
زوبان چاک زۆر کەم قۆرتی دێتەبەر
زوبانە کە سەر ئەخاتە خەتەر
کەڵەشێر تا کۆڵ بدا بەگیرە
فیتنە هەوێنی نۆ قازان شیرە
سۆفی حەرام خۆر وەک کەڵەشێرە
بانگت بۆ ئەدا و بە پیسیش فێرە
هێستر کە دایکی لە کەر بەرئەگرێ
ڕنەکی ئەکەی گازت لێ ئەگرێ
بە هێستریان گوت باوکی تۆ کێیە
وتی ڕەسەنی دایکمم پێیە
خۆزگە ئەو کەسەی بە زۆڵ دەرئەچوو
ئەویش وەک هێستر بەری نەئەبوو
پیاوی ساف دەروون کە لە شیر ئەچێ
بە گڕێ ئاگر لە پڕ هەڵدەچێ
ئاوی خوڕ هەرچەند کە ئەتترسێنێ
هەر ئاوی مەندە پیاو ئەخنکێنێ
ئاو و پیاو، مەند و مۆن بێ بترسە
هەر چیت دی ناوی باوکی بپرسە
ئەو ژنەی کە مێرد لای نەنگەویست بوو
شەوێ دزی دی، مێرد خۆشەویست بوو