ئەی کچی کورد ڕووت بە وێنەی گوڵ گەشە
لە کتێبی:
دیوانی عەونی
بەرهەمی:
عەونی (1914-1992)
1 خولەک
2918 بینین
ئەی کچی کورد ڕووت بە وێنەی گوڵ گەشە
شۆخ و شەنگ باڵات کە سەروی سەرکەشە
هەڵگرە ڕوو بەند و پێچەت بۆ چییە؟
تۆ کە ڕوو سووری پەچە بۆ ڕووی ڕەشە!
گەر بپۆشی بەرگی ڕەش شایستە بۆت
چونکە شین و ماتەمین بۆ تۆ بەشە!
ڕاستی فەرموو هێمنی شاعیر دەڵێ:
ئەو گەلەی حاشا دەکەن بوونی و هەشە!
من لە بێ دادی پەنا بۆ کوێ بەرم؟
ڕووم نییە لای کەس بڵێم چارەم ڕەشە
ئەم جیهانەی پڕ لە شادی و خۆشییە
کوردی گەر لێ لابەرێ کێ بێ بەشە؟!
کونجی بەندیخانە و سێدارەکان،
هەر بە باڵای کورد بڕاوە ئەم بەشە؟!
تا زووە خوایە هەلی کەی بای شەماڵ
سیس و ژاکاوین لە دەستی با ڕەشە!