تازەخورماتوو دێیەکە لە تەنیشت کەرکووکەوە لە
تازەخورماتوو دێیەکە لە تەنیشت کەرکووکەوە، لە زەمانی عوسمانییەکانا، لە سەردەمی غەزا غەزاکەدا «یوز باشی» یەک ئەچێتە ئەوێ بە چەند زەفتیەیەکەوە خەڵکەکە کۆ ئەکاتەوە. پێیان ئەڵێ: ئەوا غەزایە و بۆ ئیسلامە. سوڵتان ئەمری فەرمووە ئەبێ هەموو موسڵمانێک بچێت بۆ غەزا. پێشی کافرەکان بگیرێت و هەموویان سەر ببڕن. ئەمە بۆ بەرزبوونەوەی ئیسلام گەورەترین شتە و هەر کەسەش لە ڕۆژی قیامەتا تۆڵەی چاکەی خۆی وەرئەگریتەوە.
خەڵکەکە هەموو گوێیان لەم قسەیە بوو، سێ چوارێ لە ڕیشسپییەکانیان وتیان: جەنابی یوز باشی دەرفەتمان بدەرێ سبەینێ وڵامت ئەدەینەوە. یوز باشی وتی: باشە. لە سبەینێدا ڕیشسپی و دەمڕاستەکان هەموو تەگبیریان کردە یەک و چوونەوە بۆ لای یوز باشی و وتیان: جەنابی یوز باشی! خۆت ئەزانی ئێستا وەختی حاسڵات و کاسبی و دەغڵ و دان هەڵگرتنە. ئێمە بۆمان ڕێناکەوێ بچین بۆ ئەو وڵاتی کافرانە. بەشی خۆمانمان بۆ بنێرن ئێمە خۆمان لێرە بە ئامان و زامان سەریان ئەبڕین و بۆ متمانەش چەند کەسمان بەر ئەکەوێ بۆ سەر بڕین، ئەوەنە کەللەسەر ئەنێرینەوە بۆ جەنابی سوڵتان.