ئا... ئا دەبێ
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
653 بینین
یاران دەڵێن هیوا دەبێ، پێیان دەڵێم؛ ئا ئا دەبێ
جەژنێکی گەورە وا لە دوو، ڕوومان گەش و دڵ شاد ئەبێ
هێز و چەک و پوولت نییە، سەرباز و سەرکردەت نییە
پشت و پەناهێکت نییە، کێیە بەتۆ دڵداد ئەبێ
هەر با چەک و پوولم نەبێ، میللەت لە خەو هەڵسێ بەسە
پشت و پەناهـ و دەسگرم، پارێزگارم خوا ئەبێ
خوونی گەلت وا بۆتە سێل، گەورانێ ماون بوونە وێڵ
گەروا بڵێن پێیان دەڵێم بۆ گەیینەهیوا وا ئەبێ
ئەم بیرە هەرکە کەوتە سەر، نامێنێ ترسی ماڵ و سەر
پیاوی کز و بێ دەسهەڵات، لەو چاخە وەک فەرهاد ئەبێ
ڕۆژێک ئەبێ تەم لا ئەچێ، خۆریش لە کوردان دەرئەچێ
ئەو ڕۆژە هەر وەک مەحشەرە، چاک و خراپ لێک جیا ئەبێ
پێکهێنەری فەرمانی گەل، سەربەرز و پایەی ژوور ئەبێ
بەدبینی بێگانە پەرست، دوورەدەر و بەرباد ئەبێ
بەدبینە قەیرە و پیری گەل ئەوجا پەشیمانی ئەبەن
ئەو چاخی جەژنە گەورەیە، ڕۆژی گەش و نەوزاد ئەبێ
کاکی ئەسیریناسناوی ئەدەبی چی بەتۆ، ئەوجا لەژێر خاکی ئەتۆ
ڕاستی ئەوەندەت بۆ هەیە، ناوت بەچاکە یاد ئەبێ