وەرە مردن
لە کتێبی:
دیوانی ئەسیری
بەرهەمی:
ئەسیری (1895-1962)
1 خولەک
930 بینین
وەرە مردن، وەرە عزرائیل ئەمێستا کە لە کۆی
ئەمەتا وەرگرە ڕۆحم، ئەیەوێ دەرچێ بەخۆی
پیاوی وەک غەوسی دووەم، سەید عەبدولقادر
شێخ سەعید و چەن سەدی دی گەورە ئەلەم ڕێگەیە ڕۆی
بەئومێدی سەر و ماڵ و ڕەحەتی و ژینم نیم
دەبێ لەم مەسلەکەما دەس لە سەر و ماڵ بشۆی
مردنم چۆن نەوێ من کاری گەلم ڕاهی نییە
گەلی دی هەرچی هەیە گەییوەتە هیوا بۆ خۆی
ڕۆڵە بۆ خۆم نییە دەستم لە هەموو کارێ بڕا
لە هەموو کاروبەرەم تێبگە هیوام هەر تۆی
ئارەزووی دیتنی یارانم هەیە ئێستا لە کۆن
بێنە ئەی بایی شەماڵ تۆ بی خوا نەختێ بۆی
لەرە با تێکەڵە (کەی کوردم) و ڕەنجیدە ئەبم
بەپەرێشانیی سمکۆ، کە لە سەلماس وو خۆی
لاوی من، پیاوی جیهان ئەمڕۆ لە عەیش و نۆشە
ئەوە خۆراکی ئەتۆش نانی جەوە و کاسەیێ دۆی
زۆری پێ ناچێ ئەسیریناسناوی ئەدەبی دەمری بەم غەمەوە
دەمێ دێ کۆمەڵی گەل ماتەم ئەکەن ئینجا بۆی