پێخوازی چاخی
لە کتێبی:
دیوانی ئەسیری
بەرهەمی:
ئەسیری (1895-1962)
2 خولەک
553 بینین
گەر ئەدیبی، ئارەزووی سەرکەوتنی کوردت هەیە
تەرکی بێژی عیشقبازی کە، ئەگەر بیرت هەیە
بێژی تەئریخی بڵێ بۆ ئاگەداریی میللەتت
پەیڕەوی زانین و کرداری بە، گەر هۆشت هەیە
ناوی (هۆمەر) چەند هەزار ساڵە لە یۆنان هەر هەیە
بێژی تەئریخیی دەگوت، وەک ئەوبە گەر زەوقت هەیە
گوفتی بەد ئەخلاقی و ناوی ئەدیبی چۆن ئەبێ
تەرکی گوفتی چاو و خاڵ و خەتکە، و یجدانت هەیە
تەرکی کوردی و نەزمی تورکی و فارسی چۆن مروەتە؟
خۆت بەمە بێفەڕ ئەکەی بنواڕە گەر بیرت هەیە
خاوەنی بڕوای پاکی و، ئەهلی ئینسافی ئەگەر
نابێ مەنعی کەی لە خزمت، هەرچی سەرمایەت هەیە
خۆت فیدای ڕێی میللەتت کەی، گەرچی گیانت دەرئەچێ
شوورەتت باقی دەبێ، تاخاکی سەر گۆڕت هەیە
بیست ملیۆن کوردی لەو ڕۆژی چلۆن بێ خاوەنە
بۆ حەقیقەتیان بەرە، گەر توانا و زانینت هەیە
چەن عەتیقەی پێشی کلدانی لەجێی تۆ کەوتووە
خۆ نەزانی تاکو کەی؟ ئینسانی تۆش مەغزت هەیە
چاوەنۆڕە گیانیان بێ شوبهە بۆ ڕزگاریی تۆ
شەهـ سەلاحەددین و حاجی، چەند کەریم خانت هەیە
خوارە ئەو پیاوە، کە هەر تەدبیری نانی خۆی ئەکا
بۆ ژیانی میللەتت بێ، هەرچی کردارت هەیە
پەت بەمل گەر بچیە سەر کورسی لە ڕێگەی میللەتت
شاهی سەر تەختی، خەزینە و گەنج و سامانت هەیە
گەر بشێلی ئەی ئەسیریناسناوی ئەدەبی فەوجی کوردی کوڕی تۆ
وا مەزانە گۆڕە جێگەت، باغی عەدنانت هەیە