حیکمەتی خوایە
لە کتێبی:
دیوانی ئەسیری
بەرهەمی:
ئەسیری (1895-1962)
2 خولەک
566 بینین
حیکمەتی خوایە هەنێ کەس تووشی دەردی میللەتە
ئاخری لەو ڕێیە بەشیان ئاخ و داخ و حەسرەتە
دەربەدەر بوون و پەرێشانی و وێڵی سەر کزی
چوونە بەندیخانەوە، مردن بەسی پاو و پەتە
گەرچی ئەو جۆرە کەسانە بۆ خۆیان ناکەن ئۆخەی
بۆ بڵندیی ژووری گەلیان، پێوەبوونیان ڕەحمەتە
وا نەبی وا نابێ دونیا تاکو ئەمڕۆ وا بووە
پیاوی مێشک ڕوون و زانا، هەر لە ڕەنج و ئەزیەتە
مەردی مەیدانی سیاسەت مردنی نایێتە بیر
نێرەشەک بۆ کوشتە، مێ تا دەمرێ بۆ خۆی ڕاحەتە
گەرچی زوو دەمرن نیشانگای غەم و دەرد و بەڵان
ناویان تا حەشر ئەمێنێ جێو و ڕێیان جەننەتە
پاشی چەن پشتێ نەوەی پاوانی گەل لێیان ئەگەن
ماچی کێلی گۆڕییان ئەوسا بەنۆرە و نەوبەتە
هەیکەلیشیان بۆ دەکەن، پۆل پۆل دەچن بۆ دیدەنی
لاپەڕەی تاریک بەنیشانەی ئەمانە حەسرەتە
ئەو گەلانەی ژوور و گەورەن کوشتییان زۆر زوو
ڕۆڵەیان ئێستاکە بۆیە غەرقی ناز و نیعمەتە
پیاوی کردەی گەل بەپەنجە دائیمەن دیاری ئەکەن
ڕاست نییە ئەو گفتە مەشهوورە سیاسەت سیاسەتە
زیندەوەر کۆتایی هەر دێ، ساکە وایە مردنێ
بۆ گەل و نیشتمانی چا بێ، ئەو نەمانە عیززەتە
کۆنە پیاوانمان نەزان بوون، بۆ خۆیان ئاسوودە بوون
وا ئەوەی دوای ئێمە دێ، ئاسوودە وو بێ میحنەتە
چارەچیی ئەم بارە کەوتە سەر پیاوی حازری
چارەنووسمان وا بووە، بۆ ئێمە بێ ئەم پەت پەتە
ڕاستە ئەم گوفتەت ئەسیریناسناوی ئەدەبی خستتە هەڵبەستەوە
حیکمەتی خوایە هەنێ کەس تووشی دەردی میللەتە