خوشەویستیی باب و داک
لە کتێبی:
دیوانی ئەسیری
بەرهەمی:
ئەسیری (1895-1962)
2 خولەک
833 بینین
نەو ڕەسیدەی باغی میللەت چاوەکەم گیانم فیدات
گوفتی چاکەت پێ دەڵێم گوێ بگرە ئەی لاوی وڵات
داک و بابت هەر کە پیر و، کەم دەس و ئوفتادە بوون
حەق وەهایە خۆشەویستتر بن لە ڕۆڵانت لەلات
جێگەیی جیایان ببێ خزمەتکرێن دایم وەکو
خزمەتی بوتیان دەکەن هیندوو لە دێرو سەومەعات
خوا نەخواستە بێتو عاسیبی بەدڵیان گەرنەکەی
ڕاستی فایدەی نییە بۆ تۆ حەج و سەوم و زەکات
تێبفکری چاخی منداڵی نەخۆشبووی، بابەکەت
بۆ ئەوەی زوو چا ببی هەرچی هەبوو ئەیکرد فیدات
گەر لە کۆڵانا بهاتایە زریکە و دەنگی تۆ
زوو بەپێخاوسی لە دەرگا دەردەچوو بۆ لات ئەهات
چاخی ئێوارە لە کار و کردەوەی ڕاهی دەبوو
کوڵمەکانی ماچ ئەکردی پاک دەیشوشت دەست و پات
لەو شەوی دووری زمستان و، بەسەرماو و سەهۆڵ
دایکەکەت شیری دەدایتێ، ببووە قەڵغانی بەڵات
دەنگی گریانت بهاتایە لە جێگا دەردەچوو
ڕایدەژەندی لایلە گۆ بوو، تاکو چاخی ڕۆژهەڵات
چەندێ پیسیت کردە لەشیا، چەندی مرداریتی شوشت
هیچ لە ئەم پیسایییانەت، دایکەکەت قێزی هات
ڕۆژێ دەتوانی بەخێوکەی کاکە منداڵێکی خۆت
بۆیە فەرمووی پێغەمەر جەننەت لەژێر پێی ئوممەهات
لێت ڕەزابن دایک و بابت بەختیاری ئەی عەزیز
بێ شکە دوعای ئەوانە، باعیسی فەوز و نەجات
چۆن بەمنداڵی بەخێویان کردی، تۆش وا بی دەبێ
چاخی پیری هەر ئەوان بن گەورەیی ماڵ و سەرات
دەم بەدەم پاروویی چەور و خۆش و پاکیان پێ بدە
گوێ مەدە بوون و نەبوون و، گەورەیی و هات و نەهات
ئەی ئەسیریناسناوی ئەدەبی تۆ لە دەرحەق داک و بابت چی بکەی
بێ شکە دەرحەق ئەتۆش ڕۆڵەی شیرینت وا ئەکات