بەهەشتی فرمێسک
لە کتێبی:
دیوانی محەمەد ساڵح دیلان
بەرهەمی:
محەمەد ساڵح دیلان (1927-1990)
2 خولەک
909 بینین
ئەی شەوەزەنگ، ئەی تاریکی، ئەی ڕەشایی شەو
دەی... باڵی ڕەش بکەرەوە بۆ چاوی بێ خەو
بۆ بێداری.. ڕۆژی ڕوونی... تاریک و تاڵە
بۆ ناچاری... کە ڕۆژ هەرگیز زیندانە لای ئەو
کام پێکەنین پڕ لە گوڵە و گەشی ئاواتە
بۆ ئەو زەنگی بە ناسوری ڕێگای نەهاتە
کام ورشەی ڕوو یا کام پڕشەی ئەستێرە
چاوی جگەرسۆزە سینە دۆزە ئەبڕێ هەناوی
لای ئەو وێنەی ئەستێرەکەی دژی کاروانە
خشتەبەرە ڕێگای درێژە بە نزیک زانە
کام گوڵ جوانە، کام بۆن خۆشە، کامیان بە پیتە
لای ئەو هەمووی جادوگەری و نەریتە
گوڵ ئەبینی دەمی برین دێتە بەرچاوی
نەک برینێ هەزار برین ئەنوسرێ ناوی
مەل بخوێنێ، کۆڕی شیوەن پەنگ ئەخواتەوە
لە ناو سەریا ئای ڕۆڵەڕۆ دەنگ ئەداتەوە
باڵای درەخت نەو نەمام بێ یا پیرەدار بێ
ڕاست هەڵچووبێ یا شۆڕەبی قەراخ کەنار بێ
ترسێنەرە چۆنکە پاییز کە خەزانی کرد
جوانە مەر گان دێنە یادی کە دەستە مرد
قەدی چەمی ڕەنگاوڕەنگی پەلکەزێڕینە
لای ئەو یادی فوارەی خوێنی ڕژاوی قینە
بێ درێژە سرووشت چەندە ڕازاوە و جوان بێ
درەوشەدار، دڵفڕێن و پۆپی ئاواز بێ
کوورەی خەمە، دەسگای دەردە، پشکۆی
سووتانەمایەی هەنسک و ئاخی مەیدانی ژانە
بۆ ئەوکەسەی تاقە شەوێ، شەو لە شەوانی
نرخ و فەڕی گەرم گوڕی فرمێسک بزانی
ئەی شەوەزەنگ ئەی تاریکی جێگای ئارامی
جەستەی کفتی پڕ لە خوێنی زام لەسەر زامی
ئەم وڵاتە دێرینەیە ئەم گەلە کۆنە
تۆی ئاوات بۆچ ڕەنگ و ڕووت لە ڕاستی مۆتە؟
تۆی ئاواتی، تۆی کونجی مەنگ مەرزی سگاڵای
پڕ پێستێتی تاریکی ڕەش ببڕە بەباڵای
بەڵکو لە پاش کەوتنە ناو دەریای ڕەشایی
پەل ببزێوی بۆ تروسکە خنکا و ئاسایی
لەگەڵ تاڵی سەفیدەی سەر چیای نیشتمان
تینی خزمی تەوژمی کەس بێتەوە گیانمان
بەسەریەکدا کە هاتنەوە سەر بیر و سەرفام
تێر بڕێژین کوڵی دەروون، گریانی ئەنجام
ئەوسا ئەڵێین.. بۆ کۆچکردوو و چاڵی پڕ ئێسک
ئای چەن خۆشە ئاو و هەوای بەهەشتی فرمێسک