تاپۆی هێمن
لە کتێبی:
گوناهـ
بەرهەمی:
عەلی حەسەنیانی (1939-1992)
3 خولەک
1551 بینین
لەگەڵ سروەی لە دڵ خۆشی بەهاری
کە گوڵ چاوی بە مەندی هەڵدەهێنێ
لە کاتێکا پەپوولەی جوانی نەخشین
بە بێدەنگی گوڵاڵەی کەژ دەدوێنێ
***
لەگەڵ کازیوە پەیکی ژیانەوەی دڵ
کە گیان دێنێتە بەر دەشت و کەژ و کۆ
لە کاتێکا هومێدی شادی دێنێ
گزینگی خۆر و ڕەنگی شینی ئاسۆ
***
لەگەڵ قاسپەی کەوی مەستی کوڕادە
لە لای کوێستانی سەربەرزی وڵاتم
لە ناکاو زایەڵەی دەنگێ دەبیسرێ
کە دەمگوت: دێم و دێم... ئەمڕۆ کە هاتم
***
ئەوە کێیە بە دەنگی دڵ دەلەرزێ؟
ئەوە کێیە کە دەنگی ئاشنایە؟
شەپۆلی دەنگی دەڕوا بۆ هەموو لا
دنەی واتەی وەفایە، مۆسیقایە؟
***
ئەوە کێیە کە دەنگی دڵنشینی
لە گوێن دەنگی پەریی ئەوسانەکانە؟
لە نێوان بیری ڕابردوو و ئاوات
قسەی، هیوای دڵە، پردی زەمانە؟
***
لە بستوو گەی کەژی لای ڕۆژهەڵاتان
لەپڕ تاپۆیەکی ئارام و هێدی
بەرەو بژوێن و زەنوێر دێتە خوارێ
بە دینی ئارەزووی دڵ دێنەوە دی
***
کەما و مەندۆک و بیزا و هەڵز و شللێر
کەنێر و سوێسن و بەند و گیاخاو
بە تێکڕا ڕادەمووسن خاکی بەر پێی
بە ئاونگ ڕادەماڵن تۆزی پێڵاو
***
لە نواڵەی بەرزەکۆدا تاوێ تاپۆ
وچان دەگرێ و دەکا سەیری وڵاتی
مەلی بیری بەرەو ڕابردوو دەفڕێ
بەرەو چیرۆکی پڕ هات و نەهاتی
***
لە نێو بێدەنگییا دەنگ هەڵدەهێنێ
«ئەمن ئەی نیشتمان تۆم هەر لە بیرە»
وتەی چەشنی چریکەی ئاسمانی
هیوایە بۆو دڵەی زار و زویرە
***
بە چاوی پڕ ئەوین و تاسەباری
بە وردبینی، بە ئارامی، بە مەندی
دەنۆڕێتە هەموو لایەک، بزەی دێ
لە ئاکام و دوایی بەرژەوەندی
***
لە لایەک نەونەمامی باخی ژینی
«گۆڤاری سروەناوی تایبەت» بۆی هاتۆتە بەرهەم
دەڵێ: خوایە هەزاران جار شوکرت
نەبوومە ڕەنجەڕۆ، نیمە چ بڕ خەم
***
لە لایەک سەوزەڵانی شێعر و پەخشان
بەرەو بووژانەوە و پێش کەوتە ئەمڕۆ
زەمەندی دڵڕفێنی مێرگی فەرهەنگ
پەناگەی مامزی خۆش ڕەوتە ئەمڕۆ
***
لە لایەک زێدەکەی زێدە لە جاران
جوانە، خەمڕەوێنە، تیشکی داوێ
لەبەر خۆوە دەڵێ هەر ئاوەدان بێ
هەوێنی شێعرەکانم، شیلاناوێشوێن
***
لە لایەک ڕووگەی ئاواتی، مەهابادشوێن
شەمی کۆڕی هونەر، هەر دڵستێنە
مەکۆی دڵخۆشی، مەڵبەندی وەفایە
هەتاوی شادیهێنە، شەوڕمێنە
***
ڕەزامەندە لە گەشتی شاعیری پیر
کە خونچەی ئارەزووی خەمڵیوە ئەمڕۆ
بزەی دێ و چاو لە هەر لایە دەگێڕێ
دەڵێ خوایە شوکور ڕووناکە ئاسۆ
***
بەڵام داخی گران و سەد مەخابن
تەمەن کورتە گوڵی بژوێنی خۆشی
هەتاوی شادی و ئۆخژنی شاعیر
دەبێ ئاوا لە پشت کێوی پەرۆشی
***
لەپڕ هەورێکی زەردی ناحەزی تووش
لە دووری کەم کەمە سەر هەڵدەهێنێ
دەڵێی دێوەزمەیەکی گیانستێنە
کە دێ شادی دەبا، ماتەم دەمێنێ
***
وچان ناگرێ ئیدی چیدیکە تاپۆ
بە خەمباری، بە چاوی پڕ لە ئەسرین
دەڕوا، ئێمە دەمێنین و تەمی زەرد
دەبێ خەم داگرین، ئەسرینێ بسڕین
***
بەڵێ هێمنکەس کە شینگێڕی شەهیدە
دەچێ تا بۆ هەڵەبجە شین بگێڕێ
دەچێتە شارەزوور تا لالەکانی
بە فرمێسکی دوو چاوی خۆی بدێرێ