چوارخشتەکی
لە کتێبی:
گوناهـ
بەرهەمی:
عەلی حەسەنیانی (1939-1992)
2 خولەک
1737 بینین
چوارخشتەکی
بە دەنگی: عەلی حەسەنیانی
چاوم بە تۆ کەوت و تاوڵی ژین ڕما
تۆ بیرەوەریی ئەوینی مردوومی چما؟
تۆم دیت و نەما هێز و بڕستم، هەبەسام
وەک کەشتی کە گیرابێ لە نێو بەندی لما
***
تۆ ئاگری سووتێنەری، دڵخوازی منی!
ئارامیدەری دڵی منی، ڕازی منی!
چاوت گوڵ و لێوت گوڵ و بەژنت هەر گوڵ،
گوڵخوازم و تۆش گوڵی، گوڵی نازی منی!
***
ناپرسی لە من کە بۆچی ڕەنگم زەردە؟
نەتدی لە سەر ئەم دوو لێوە زەردە، زەردە
ژین ڕۆیی و پێم ناوەتە سەر لێوی گۆڕ
پاییزە، گەیشتە دەمی بستوو زەردە
***
ئاواتی منە ژیانی بێ تووشی دەمێ
دڵخۆازی دڵە ماچی دەمی خونچەدەمێ
کوا یاری دڵئەستێن و شەو و شێعر و شەڕاب
ئەو خۆشی بە من بدا، منیش گیانی دەمێ
***
پێم خۆشە لەگەڵ تۆ ئاشنا بم، نابم
بۆ تۆ و ئەوینی تۆ فەنا بم، نابم
چت دیوە لە من لەخۆوە هەر دوژمنمی؟
من دۆستم و بۆ دوژمنی نابم، نابم
***
کەوتوومەتە نێو گێژی زرێی ڕەنج و خەمان
بۆ مانەوە پێم ناوەتە ڕێی مان و نەمان
هەوڵ و تەقەلام هەر پەلەقاژەی ژینە
ئاخۆ دەگەڕێ بە کامی من سووڕی زەمان؟
***
ژینی منی ئاوارە هەمووی شێوانە
جامی تەمەنم لە ژەهری خەم لێوانە
هەر دێت و نزیکتر دەبێ لێم تاپۆی مەرگ
هاوارە لە من، موویەکمان نێوانە
***
دووریی تۆ گڕی هەزار خەمی خستە دڵم
لێم کەوتۆتە نێو گرێی هەزار ڕستە دڵم
تەندووری خەمت بۆ دڵەکەم گرفەی دێ
تۆ خۆش بی ئەگەر کەوتۆتە سەر بستە دڵم
***