پەسنێ شۆخەکێ
لە کتێبی:
شەفاق
بەرهەمی:
جگەرخوێن (1903-1984)
3 خولەک
635 بینین
ئەی دەلال شەنگ و شۆخ و ، پر شرین و گەور و رند!
وەک کەچا میرێ ملایە، تم سوار تێ ئەو ژ گوند
ئەز دنالم بێ هەڤالم، دلبژێ بەژنا بلند
من ژ بۆنا ماچەکێ ژێ، دانین لبەر پێ چین و هند
ئەی هەڤالێ، وەی دەلالێ!، دلبژێ چاڤێنتە مە
ئەز نزانم کێ دو چاڤێن، تە ولۆ دانینە رەش؟
تیر ژ وان چاڤێن درەش، تێن دل، هەزار و شێست و شەش
بسکا ل سەر دێمان دلیزن، روو گولا پر سۆر و گەش
..
ئەی هەڤالێ دل ل بالێ!، دلبژێ دێمێن تە مە
دێم وەکی سێڤێن خەلاتێ، روو سپی و سۆر و زەر
بسکێ تاری تا ب تا، تێن سەمایێ خوەش ل سەر
ئاهـ و ئاخین، سەد هەوار و، نال و قێرین من ژ بەر
...
ئەی هەڤالێ ئەبروو دالێ!، دلبژێ برهێن تە مە
هەردوو ئەبروو رەنگێ هەیڤا، یەکشەڤی خووز و زراڤ
دێ ل وی جەژن و جەما بت، گەر ببێنی یەک ب چاڤ؟
روو د بن دە رەنگێ رۆژە، دا جیهانێ شەوق و تاڤ
پۆز وەکی ئالماس و گەوهەر، نێئای دەستێ کەس ب لاڤ
ئەی هەڤالێ، وەی شەپالێ!، دلبژێ پۆزێ تە مە
پۆز بلندە، گەور و رندە، رەنگێ ماس و گەوهەرە
بەژن و بالا تۆخ و ئالا، دلرەڤا و خوینخوەرە
هن دبێژن پادیشاهە، هن دبێژن سەروەرە
لێ چقاسی خوینشرینە، دلرەڤا و دلبەرە
ئەی هەڤالێ چاڤ خەزالێ!، دلبژێ لێڤێن تە مە
لێڤ، وەکی خونجێ گولانە، کەنگی تێن کەن، سۆر و گەش
ئافەرین سەد ئافەرین، ماچەک ژ وان دا من چ خوەش
گول ژ لێڤێ دێم ژ سێڤێ، هەردوو ئەبروو خوار و رەش
دل دکی تالان بجارەک، کۆ ژ برجێ تێ ب مەش
ئەی هەڤالێ سەبر و مالێ!، دلبژێ بەژنا تە مە
بەژنەکا شۆخ و شەپالە، رەنگێ سەروا سەر جوێ
تاجەکە تەڤ زێر و گەوهەر، دا سەرێ خوە خوسروێ
من ب سەد لاڤ و گرینێ، دەست گهاندە زەنگوێ
...
ئەی هەڤالێ پر دەلالێ!، دلبژێ نەوقا تە مە
نەوقەکا ناز و شرینە، کەمبەرا زێرین دبەر
پر دەلالێ دێم شەمالە، ترهک و نازدار و تەر
مێر و ژن تەڤ لێ دنێرن، کۆ ژ برجێ تێتە دەر
لێ ل سەر سینگێ دو سێڤن، رەشگولی جەنگن ل سەر
ئەی هەڤالێ دێم ب خالێ!، دلبژێ گولیێن تە مە
رەوش و پەرگال پر جوانە، هۆستە پر خوەش دانییە
هن دبێژن: ئەڤ شکاکی، هن دبێژن: وانییە
یان مەلایێ باتییە، یان ژی مەلایێ خانییە
...
ئەی هەڤالێ پر جەمالێ!، دلبژێ تلیێن تە مە
زەرتلی مووم و شمانە، لێ دو گوستیل زێر و زیڤ
وەک ستێران خوەش دیسن، لێ ل ژۆرێ ئەبروو هیڤ
بازن و زەند و تلی، گوستیل ب هەڤرا بوون کریڤ
ئەز ب رۆژی بووم دەما، من دی فراڤین کریە شیڤ
ئەی هەڤالێ رۆژ و سالێ!، دلبژێ چیمێن تە مە
چیم ژ بەرفا شەڤنڤستی، کۆ خونافەک لێ کری
سەر ژ گۆرێ رادکن، سەد سەد ل پێژنا وێ مری
ئاگرەک بەردایە دل، هەتتا کو ساخم نامری
ئاهـ و نال و قیر و هاوار، من ژ بەر ڤی ئاگری
ئەی هەڤالێ تم ل بالێ!، دلبژێ دینا تە مە
ئەز جگەرخوین بووم ل سەر تە، ئاهـ و نالین تم گری
ڤی گرانبارینە ئەز بم، کی دکاری هلگری؟
جارەکێ پرسێ تو ناکی، قەی ل کۆلێ بەر دەری؟
ئەڤ جهان یەکسەر ئەڤینە، لێ تو کۆک و ژێدەری
ئەی هەڤالێ ئەز د تالێ!، رەنگێ ئایینا تە مە