فەراتم کێفەراتم

گوژ-گوژ و هم-هم فەراتم، فەرات...
خوش-خوش و خوم-خوم فەراتم، فەرات...
فەراتم، کێفەراتم
کارم، خەباتم
ژین و فەلاتم
ڤایە ئەز هاتم
ژ ژۆرڤە ئەز تێم
دچم بەر بژێر
د ناڤ دلێ من
تەڤ گەوهەر و زێر
فەراتم...
ب هم-هم ئەز تێم
بێ سەر و بێ بن
سەر دەریا مەزن
فەراتم...
دازوازا ملەت
فەراتێ دژوار
د بەر خوە دبم
تەڤ گەرش و گەمار
فەراتم...
دەنگێ سەوییان
رەنگێ برچییان
ئەز دەنگێ شڤان
خاما خوەندەڤان
فەراتم...
تەڤ ئاهـ و نالین
گریان و قێرین
ب چەلق و لەم-لەم
هەمی کول و خەم
فەراتم ...
دچم پێش ب رست
وەک ستێر و رست
هەمی دەرد و کول
دکەڤم ناڤ دل
فەراتم ...
د دلێن خۆرتان
دکەلم هەردەم
بەر پۆزێ دژمن
ئەز خیپ و کەلەم
فەراتم ...
ئەز خوەندەواری
ئەزم هشیاری
دوور و درێژم
گاڤان تاڤێژم
فەراتم ...
د ناڤ دلاندە
پر خورت و ب تین
د ناڤ دامارێن
خۆرتاندە بووم خوین
فەراتم...
د سەر هەڤرە تێم
ب چەلقین و گوژ
د بەر خوە دبم
دژمنێ خوینمژ
فەراتم، کارم، خەباتم
ئەز کێفەراتم
ڤایە ئەز هاتم
ژ کوردستانڤە تێم
پر خورت و ب تین
ئەز پێتا جەرگ
و دلێ جگەرخوین