دوو وێنە
لە کتێبی:
تریفەی هەڵبەست
بەرهەمی:
شێرکۆ بێکەس (1940-2013)
1 خولەک
1 بینین
بەیانیی دیم، وەکوو بەهار سەر لقی ئاڵ بوو
بۆ نەورۆزی مژدەی ژیان، نێرگزی ساڵ بوو
گەشەی گیانی لە باوەشی دایکی شادییا
وەک جریوەی دەم ئەستێرەی خۆشی ساماڵ بوو!
***
بەیانیی دیم، بزەی لێوی وەکوو مانگەشەو
سەر ڕوومەتی گۆمی شینی هیوای ماچ ئەکرد
جوانیی سروشت، دنیا هەمووی بۆ شۆخێتیی ئەو
لەبەر پێیا، دامابوون و سوجدەیان ئەبرد!
***
ئێوارەش دیم، وەکوو پاییز کز و زەبوون بوو
لەشی جوانی، خۆراکی دڕک بۆ زەبری بەرد بوو
بزەی لێو و گەشەی گیان و ئاواتی دەروون
نمێ فرمێسک، ئاخێکی قووڵ، ڕەنگێکی زەرد بوو!