بۆ چاوە شینەکانی

شیعری شیرین
بۆ چاوی شین
گەلێ پرسیاری هێشتەوە
بەبێ وەرام
ئەوەی نەدا بە دەستەوە
تەواو بێ لام
وەکوو مەرام.
ئێستاش هۆنراوەی مەبەستم
ئەوەی نەگەیاندە دەستم
کە من ویستم
چاوشینەکەی خۆشەویستم.
لەسەر جێی داخ
بەبێ خەوی
شەوگاری ئاخ
وەک زۆر شەوی: فریشتەی شیعری «مەولەوی»
چاوانم پڕ
لە ئەشکی خوڕ
ئەڕژانە سەر
پەڕەی دەفتەر
هەتاوەکوو شیعرێ دانێم
مۆری چاوی شینی پیا نێم.
ناخی دەروون
مات یان زەبوون
لەبەر بارەگای شیعردا
زۆرجار وەنەوزی وای ئەدا
کە تا ژیان
مژدەی بەیان
دیاریی نەکا!
فریشتەی شەو
دێڕێ شیعر
بۆ چاوی ئەو
بە من نەدا
هەتاوەکوو شیعرێ دانێم
مۆری چاوی شینی پیا نێم.
ئەم لام ئەکرد
پەنام بۆ خوای جوانی ئەبرد
بۆ قوبەی شیناییی ئاسمان
دنیای ئیلهامی لای ئەوان
بۆ تریفەی مانگی ساماڵ
بارەگای ئەشقی هەزار ساڵ
پەنام ئەبرد
بۆ ئەستێرە
شیعرم بۆ بێنێتە ئێرە
هەتاوەکوو شیعرێ دانێم
مۆری چاوی شینی پیا نێم
نە من، نە ئەستێرەی شیرین
نە ئەفسوونی پەنهانی ژین
نەمانتوانی بۆ چاوی شین
شیعرێ بە دیاریی بنێرین!شیعری شیرین
بۆ چاوی شین
لە هەڵبەستی منا ئەژین.