شیعرەکانم
لە کتێبی:
تریفەی هەڵبەست
بەرهەمی:
شێرکۆ بێکەس (1940-2013)
1 خولەک
1309 بینین
پەپوولەی هەستی ناسکی، باڵ نەخشینی شیعرەکانم
لەسەر لێوی هیوای گەشی ئەم ژینە ئەنیشێتەوە
دەزووی تیشکی وردی پەنجەی ئەفسووناویی بیرەکانم
تریفەی مانگ لەژێر هەوری گومانا ئەبینێتەوە.
***
کیژی سۆزی وشەکانم لەناو چیمەنی ئاواتا
بەدەم بەستەی ئاهەنگەوە، گیان شاد ئەکەن، هەڵئەپەڕن
سواری بڕوای قسەکانم لەناو مەیدانی خەباتا
ڕێی دەربازبوون لە ناپاکان، لە دوژمنانی گەل ئەگرن.