لەمەو لاوە مەگەر باری قەزا بێ
لە کتێبی:
دیوانی عارف عورفی
بەرهەمی:
عارف عورفی (1896-1961)
1 خولەک
364 بینین
لەمەو لاوە مەگەر باری قەزا بێ
دڵی من موبتەلای جەور و جەفا بێ
گوناهی چی بوو ئەی شۆخی ستەمکار
بە دەستی جەورەوە دڵ موبتەلا بێ
ئەگەر مردم گوناهی من بە ئەستۆت
حیسابی میحنەتم يوم الجزاعەرەبی بێ
دەمێکە خۆم ئەپارێزم لە دڵبەر
بڵێم چی گەر بەڵایی لابەلا بێ
هەتا ماوم لە دونیادا لە حەققم
ئەگەر چاکی نەکا چاکی کەوا بێ
کە چووم چوونم نەهاتە تا قیامەت
مەگەر گەردم بەدەم بادی سەبا بێ
لە دونیادا نەبوو کەس لێم بپرسێ
مەگەر دادم لە دیوانی خودا بێ
لە ڕوویی مەرحەمەت ڕۆژێ ئەزانێ
لە حاڵی من ئەگەر ساحێب وەفا بێ
خەیاڵی شەوقی ڕووی مەستی نەکردم
دەخیلە ساقیا زوو کە شەرابێ
شەرابی ئاخری ڕۆژم بنۆشم
ئیتر با دەرد و میحنەت ئینتیها بێ