هێندە بێزاری کە زانیومە بە زاری نایەوە
پڕتەوی شەمس
لە کتێبی:
دیوانی حەریق
بەرهەمی:
حەریق (1856-1909)
2 خولەک
1040 بینین
هێندە بێزاری کە زانیومە بە زاری نایەوە
دوور لە باڵاکەت سەرینی نائومێدیم نایەوە
بولبولێکی خۆشنەوا بووم بۆ نەوای دەوری گوڵت
کێ وەکوو هودهود حیکایاتی سەبای گێرایەوە
بۆ پیاڵەی مەیلی لەیلا قەلبی مەجنوون قابیلە
شۆڕشی شیرین لە ناڵەی کۆهکەن فامایەوە
حەیفێ هێندەت دەربەدەر کرد دڵ لە ئیقلیمی ویسال
شیری منداڵیت بە زەهری هیجر پێ هێنایەوە
بۆ کەناری سەوزەیی دەوری گوڵی ڕووت شین دەکەم
خاکی کۆی ئیشقت بە بێژنگی سەرم بێژایەوە
کەوتە سەر خەرمانی عومرم ئاگری تولی ئەمەل
سەد کەڕەت بارانی وەعزی لێدرا نەکوژایەوە
شیری ئەبرۆ، تیری موژگان، تاق و جووت دەنوێنێ پێم
تا بزانم ڕووحی شیرینت چلۆن کێشایەوە
جێی نەزەر بوو حاشییەی زوڵفت لەسەر ئایاتی ڕووت
زۆر موتاڵام کرد وەکوو دەور و تەسەلسول مایەوە
تاقی میحرابی برۆت جێی نازە بۆ ئەهلی نیاز
سۆفی وەیزانی کەچە هێند کەر بوو خۆی گێڕایەوە
شەمعی خووبان پڕتەوێکی شەمسی ڕووی تۆی لێ کەوت
هێند حەیا و شەرمی بە خۆیدا هات بەجارێ توایەوە
گوڵبژێرێکی زەریفم کرد لەنێو باغی خەیاڵ
خۆزگە مەردێکی «ڕەشید» بۆ «شێخی» بخوێندایەوە