شێرۆیە غوڵامێ بۆ خزمەت شیرین دەنێرێ
لە کتێبی:
شیرین و فه‌رهاد
بەرهەمی:
کەمالی (1886-1974)
1 خولەک
28 بینین
ڕۆژێ شێرۆیەی زاڵمی لەعین
غوڵامێکی نارد بۆ خزمەت شیرین
وتی عەرزی کەن شیرینی خۆشبوو
وەعدەی چل ڕۆژە ئەوا تەواو بوو
دەلیلی شێرۆ چوو بۆ لای شیرین
تەعزیمی بۆ کرد کەوتە سەرزەمین
ڕاسپێری شێرۆ عەرزی کرد تەواو
شیرینی ئەرمەن زوڵف حەریری خاو
وتی ئەی دەلیل مەحڕەمی کاران
ئاگاداری کار شاهـ و خونکاران
هەر وەکوو شێرۆ بە من مەجبوورە
منیش بەبێ ئەو چاوم بێ نوورە
ڕوخسەتم بدات تا ئەچمە حەمام
ئاراییش بکەم لە سەر تا بە پام
سەرێکیش بدەم لە قەبری خوسرەو
لە پاشان ئەمجا دێمە خزمەت ئەو
ئەمری کرد شیرین بە کەنیزەکان
چوون لەبەریان کرد جلی تازە و جوان
خۆشی لیباسی ڕەشی زوودا کەن
سەرتاپا پۆشی زەڕبەفتی خوتەن
ئاخرین جار بوو شیرینی جەم جام
لەسەر دونیادا کە چوو بۆ حەمام
خۆی ڕووت کردەوە شۆخی نازپەروەر
ڕۆیشتە حەمام وەک مانگی ئەنوەر
لە شۆقی جەماڵ شیرینی خۆش خوو
تاریکی حەمام تەواو ڕووناک بوو
شیرینی ئەرمەن شۆخی مەستە چاو
خۆی شوشت بە عەتر و عەبیر و گوڵاو