باسی میعراجی حەزرەتی محەمەد
لە کتێبی:
شیرین خوسرەو
بەرهەمی:
کەمالی (1886-1974)
1 خولەک
152 بینین
شەوێک دوور لە سەیر سەرای فانی بوو
ئەحمەد لە سەرای ئوممو هانی بوو
جیبریلی ئەمین لە بەیتولمەعموور
بوراقی هێنا موتەلەل بە نوور
لە هەوری نیسان دووڕئەفشانتر بوو
لە بادی سەبا خۆشعەنانتر بوو
لە مەدینەوە شاهی ئەنبیا
سواری بوراق بوو گەیشتە ئەقسا
لەوێ حازربوون هەموو ئەنبیا
ئیمامەتی کرد شاهی پێشەوا
لەوێوە چوو بۆ فەلەکی خزرا
ئاوزەنگی لێدا سەحرا بە سەحرا
بەو تیژباڵییە تاوسی ئەخزەر
بەجێ ما هەڵی وەراند باڵ و پەڕ
جیبریلی ئەمین قوەتی نەما
دوعاخوازی کرد ئاخر بەجێما
بوراقی تاودا دەرچوو لە کەونەین
بەیداخی هەڵکرد لە قابەلقەوسەین
بیستی کەلامی زاتی سەرمەدی
خودای تەعالای بە چاوی سەر دی
ئەعزای دەستی کرد بە ڕەقس و سەما
چاو لەبن هەموو مووێکی ڕووا
خودا فەرمووی تۆ مەقسوودی دەرگا
مەتڵەبت چییە داوا کە داوا
بۆ گوناهکاری ئوممەت دوعای کرد
خودای تەعالاش دەرحاڵ گیرای کرد
ئوممەتی خۆی کرد بە بەرات دڵشاد
گوناهکاری کرد لە دوزخ ئازاد