باسی مردنی فەرهادی کۆهکەن
لە کتێبی:
شیرین و خوسرەو
بەرهەمی:
کەمالی (1886-1974)
2 خولەک
3 بینین
خوسرەو جاسووسی زۆری دانابوو
حاڵی شیرینیان تێ دەگەیاند زوو
خەبەریان دایە گوتیان کە شیرین
چوو بۆ دیدەنی فەرهادی مسکین
لە عیشقی شیرین وا بە دەستوبرد
ئەو کێوە سەختەی پارچەپارچە کرد
ئەگەر بەم نەوعە کار بکا فەرهاد
بە یەک مانگی تر کێو دەدا بە باد
وەختێ ئەمەی بیست شاهی تاجدار
پرسی لە پیاوێ عاقڵ و هۆشیار
گوتی تەدبیرم چییە چۆن دەبێ؟
شیرینی ئەرمەن لە دەستم دەچێ
ناردیان پیاوێکی مەلعوونیان هێنا
گوتیان بە گورجی بچۆ هەر ئێستا
بڵێ بە فەرهاد خاکت بە دامان
شیرینی نازدار شای نەونەمامان
لە دونیا دەرچوو ئەی قوڕت بەسەر
هەر ڕەنجێکت دا ڕۆیشت بە هەدر
وەعدیان دایە لە زێڕ و لە ماڵ
چەند تەلەب بکات بیدەنێ دەرحاڵ
دەستبەجێ کابرا چوو بۆ لای فەرهاد
گوتی داخەکەم ڕەنجت چوو بە باد
بێ عەقڵی نەفام دڵ پڕ داغ و دەرد
ئەمجا چی دەکەی شیرین ئەمڕۆ مرد
ئەو لاشە جوانەی کە وەکوو گوڵ بوو
داخەکەم ئەمڕۆ ئەسپەردەی گڵ بوو
فەرهاد ئەمەی بیست بە پەژارەوە
لەسەر تاقی بەرد کەوتە خوارەوە
بە دەنگێکی بەرز گوتی ئاخ شیرین
گیانی تەسلیم کرد بە گیانئافەرین
شیرین لە پاشان خەبەری زانی
کەوا فەرهاد مرد بە دڵگرانی
چوو بۆ سەر لاشەی فەرهادی کۆهکەن
زۆر لاواندییەوە بە گریە و شیوەن
کفن و دفنی کرد بە ڕەسمی شاهان
سپاردی بە خاک بە دیدەی گریان
گومەزی بۆ کرد عالی و شاهانە
قەبری فەرهاد بوو بە زیارەتخانە
چونکە کوهکەن ڕەنجی بردبوو
بە ناڕەحەتی و میحنەت مردبوو
بەبێ ترس و خۆف لە تەعنەی ئەغیار
تەعزییەی بۆ کرد شیرینی نازدار
ئەمجا لە پاشان پادشای جیهان
لەو کارەی کردی زۆر بوو پەشیمان
لەسەری بار بوو غەم و پەژارە
موتەئەسیر بوو بە دڵ لەو کارە
لە دڵدا دەیگوت زۆر خراپم کرد
دەبینم جەزای ئەمە دەستوبرد