نووسین

ئەو وەختەی بە لاسکی دارمێوێ بنووسم
هەتاکوو هەڵئەسم
سەبەتەی کەغەزم پڕ بووە لە هێشوو!
جارێکیان بە سەری بولبولێ من نووسیم
کە هەستام پەرداخی بەردەمم پڕ بووبوو لە جووکە.
ڕۆژێکیان بە باڵی پەپوولە من نووسیم
کە هەستام سەر مێز و ناو تاقی پەنجەرەم
پڕ بووبوون، لە گوڵەوەنەوشە
ئەو کاتەی بە پەلکی گیای دەشتی ئەنفال و هەڵەبجەیش بنووسم
کە هەستام ئەبینم
ژوورەکەم، ماڵەکەم، شارەکەم، وڵاتم
هەر هەمووی پڕ بووە
لە مەمکی ژنان و لە چاوی منداڵ و
لە قیژە و زریکە!