بۆ کچێکی قەرەج

کچێکی قەرەجم خۆش دەویست
ئەو ڕازی ئەوینی فێر کردم
وەک شەماڵ
ڕۆحێکی ئازاد و ڕەها بوو
من دەمویست لە تەکیا بژیم و
بە دەوریا سنوورێک بکێشم
هەرێمی ئەوینی بۆ بکەم بە سامان!
ڕۆژێک لای ئێوارە
گەردەلوول بە زەبر
جاڕیدا بە گوێچکەی هۆبەدا
خێڵی گوڵ چۆڵی کەن بۆ بەفر!
من لە پشت پەنجەرەی دڵمەوە ئەگریام
ئەویش وەک خۆرەتاو
لە ئاسۆی شارەوە ئاوا بوو!
ئیتر لەو ڕۆژەوە
من بووم بە قەرەج و
ئەو بوو بە نیشتمان!