در بیان آمدن فاطمه دختر پادشاه شام به مکه به امید وصال عبدالله
لە کتێبی:
روضة الصفا
بەرهەمی:
میرزا عەبدولقادری پاوەیی (1850-1910)
7 خولەک
639 بینین
جەو دما شەخسێ فاتمە نام بێ
فەرزەند عەزیز پادشای شام بێ
جە عێلم نجووم تەمام هوشیار بێ
خەیر و شەڕ یەکسەر جە لاش دیار بێ
مەزاناش دنیا ئەمن و ئەمانەن
وادەی پەیغەمبەر ئاخر زەمانەن
جە سولب شەخسێ ساحێب مەراقێب
یەکێ جە ئەولاد «عبدالمطلبعەرەبی»
هەر جەو دوودمان مەبۆ بۆ پەیدا
وەختەن جە عاڵەم ببۆ هۆوەیدا
خولاسەی کەلام مەلەکەی شامی
شای نازەنینان نامیەی نامی
هەفت قەتار ئوشتر خەزێنەی مەدفوون
یەغڎان گشت لەبڕێز جە دوڕ مەکنوون
دانە و مرواری، یاقووت و ئەڵماس
پەسەندیدەی تەبع جەواهیر شناس
گەنج بێ سامان خەروار وە خەروار
فەرما قەتار چی قەتار کەردش بار
بادیەی عەرەب بەیدیان تەی کەرد
تا مەنزڵ وە لای شار مەککە بەرد
سالار ڕێندان، دەلیلەی ڕەم کێش
هۆردا بارەگای خەیمە و خەرگای وێش
جەو دەم عەبدوڵڵا جە ڕاگەی شکار
موراجەعەت کەرد ئاماوە پەی شار
ناگا بانووی شام دیش وێش ئاسا
گەوهەر شناس بێ، گەوهەر شناسا
ئاخێز کەرد نە جا والی زادەی بەڕ
خەراما وە ناز چوون لەولاو تەڕ
شی گێرتش جڵەو عەبدوڵڵا وە ناز
واتش پیا بەر ئەی یار دڵواز
عەبدوڵڵا جە ئەسب پا ئاوەردەوە
چەنی دڵبەر شی وە تۆی پەردەوە
تەک دا وە بان فەرش ئاڵای ڕەنگاڕەنگ
خەیلێ حەیران مەند جەی دەستگای قەشەنگ
جە ناگا ئەو شۆخ دەس بەرد پەی سەرپۆش
چوون هەور نە ڕووی مانگ نقاب وست نە دۆش
وێش وە عەبدوڵڵا زەریف نمانا
چەند گەنج و گەوهەر، چەند ئەفسوون وانا
واتش من نە شام عەزم تۆ کەردم
پەی تۆ جە شاهی حێجاز ویەردم
ئی گشت بارخانە و مەتای گرانبار
ئەقمەشەی بێ عەیب، دوڕ شاهوار
تەمامی یەکسەر پەی تۆم ئاوەردەن
ئەموالم بە تۆ گشت توفەیل کەردەن
وێم خۆ هەم مەعرووف مەلەکەی شامم
مەحبووب ئافاق موانان نامم
پەی تۆ بەرشیەن جە حەد ئێخلاسم
مەعلووم تۆ پەی من، من پەی تۆ خاسم
جفت من و تۆ هەر نیەن جە کۆن
کاڵای من لایەق هەر وە باڵای تۆن
وە ئایین وێت تۆ من دیاری کەر
ئەلئان نێکاحم پەی وێت جاری کەر
عەبدوڵڵا واتش بەڵێ مەلیحەن
گوفتارت سەریح، قەوڵت سەحیحەن
بەڵام بێ ڕوخسەت ئیجازەی پدەر
نمەبۆ پەی من هەرگێز مویەسسەر
«عبدالمطلبعەرەبی» هەر نەوعێ ڕەیشەن
سەردار سەنگین مەککە و قورەیشەن
ئێمشەو نە خدمەت ئەو بزورگەوار
مەزموون مەتڵەب مەکەروون ئێزهار
هەر چی قەرار دا فەردا هەم جە نۆ
فەرموودەی ئەمرش ماوەروون پەی تۆ
ئێڎ وات و خێزا چوون سەوڵ ساوا
سوار بی وە ئەسب وە مەنزڵ یاوا
پیا بی دەرلاد سەلاح کەند جە وەر
ئاما وە مەنزڵ ئامینەی دڵبەر
یەکێ پەروانە یەکێ وێنەی شەم
چوون گوڵ و بوڵبوڵ واسڵ بین وە هەم
ئەو شەو وە مەیلان بینای بێ ئەندێش
نوور موحەممەد یاوا وە جای وێش
بەر شی نە جەبهەی ئەو عالی نەسەب
کەوت وە بەتن پاک ئامینەی وەهەب
دەرلاد زیاد بی حوسن و جەماڵش
یاوا بە ئەفلاک پایەی ئێقباڵش
عاڵەم گشت تەمام بین سەنا خوانش
موتیع بە فەرمان ئەمر و فەرمانش
«عبدالمطلبعەرەبی» مەشی وە ماڵش
پەی پەی مەپەرسا حاڵ و ئەحواڵش
بەعد عەبدوڵڵا سوجدەی پدەر بەرد
قسەی مەلەکەی شامش گشت عەرز کەرد
«عبدالمطلبعەرەبی» وە بێ چوون و چەند
وات ئەر تەقدیرش کەردەن خوڎاوەند
باعێس نمەبوون، عەیبێ نەدارۆ
بشۆ بوینەش جە نۆ هەم ئارۆ
عەبدوڵڵا دەرلاد خێزا بە زوودی
لوا وە سەر وەخت وەعدەی مەوعوودی
داخڵ بی نە تۆی خەیمەی لا جەوەرد
چەنی فاتمە سەبباحەلخەیر کەرد
واتش مەتڵەبم عەرز پدەر کەرد
فەرما وە ڕەزای تاک تەنیای فەرد
هەرچی جە لای حەق موقەددەر بیەن
مەبۆ هەر ببۆ تەدبیرش نیەن
«عبدالمطلبعەرەبی» سەلاح دان جە نۆ
من هەم مەیلم هەن وە نێکاح تۆ
چوون مەلەکەی شام تماشای ئەو کەرد
دوو سێ جار پەی پەی کێشا ئاهـ سەرد
زانا نەمەندەن نوور جە پێشانیش
مولتەفێت نەبی بە مێهرەبانیش
واتش من عاشق شەوق ئەو نوور بیم
نەک وە عەیش و نۆش شەوهەر مەسروور بیم
بە خوڎا مەیلی من نە نەفسانی بێ
نە هەوا و هەوەس نە شەیتانی بێ
مەقسوودم هەر نوور ئەو نبووەت بێ
ئەو دەریای کەرەم ئەو فتووەت بێ
حەق نەڎاش وە من چوون مەیل وێشەن
ڕەزاش بەو تەورەن فایدەش چێشەن
فەوری خەرامان خوڎاحافێز کەرد
بارخانەی ڕەنگین وێش بار کەرد و بەرد
تا یاوا وە شام هەر بەو دڵەی ڕێش
نائومێد پاڵ دا وە بوتخانەی وێش
بەڵام ئامینە و عەبدوڵڵا وە هەم
دایم مەوسوول بین چوون پەروانە و شەم
هەر شەو تا وە سوب، هەر سوب تا ئێوار
لادێ وە بێ یەک نەبێشان قەرار
تا کە ئامینە عێسمەت پەناهە
چوون حەمڵش یاوا وە چوار ماهە
«عبدالمطلبعەرەبی» دایم جە هەر حاڵ
مەکەردش خەلعەت مەپەرساش ئەحواڵ
تا شەش ماهـ ویەرد ئەو سەوڵ ساوا
نێدایێ جە غەیب وە گۆشش یاوا
واتش ئامینە موژدە بۆ وە تۆ
حەمڵ شەریفت فەرزەندێ مەبۆ
گرۆی مەلەکووت جە نام نامیش
مەکەران نە گۆش حەڵقەی غوڵامیش
فێشتەر جە مەخلووق دنیا سەرانسەر
مەبۆ ئوممەتش تا «يوم المحشرعەرەبی»
مایەی حەمڵ وێت زەریف بزانە
نام شەریفش موحەممەد وانە
خوەرشید نوورش وە تۆ عەیانەن
بزان پێغەمبەر ئاخر زەمانەن
ئامینەی وەهەب سوجدەی شوکرش بەرد
دەرلاد وە «عبدالمطلبعەرەبی» عەرز کەرد
واتش ئاوازێ ئاما نە گۆشم
مەزموونش هەڵای نەشیەن جە هۆشم
«عبدالمطلبعەرەبی» موقەددەر ئەو ڕۆ
وات بە عەبدوڵڵا، فەرزەند! مەبۆ تۆ
بشی مەدینە وە شادمانی
خورما باوەری پەرێ مزگانی
ئامینە حەمڵش خەیلێ پەسەندەن
یەقین فەرزەندێ سەعادەت مەندەن
بە قەوڵ مەکتووب کاهنان کار
ڕەمز ئەو فەرزەند گشت کەردەن ئێزهار
تا موعاودەت فەسڵ ئامای تۆ
نەزدیکەن هەم وەزع حەمڵ ئەو ببۆ
ئەرسەد هەوا گەرم ڕاگەت هەم دوورەن
فەرزەند! وە زەبان فەرزەند زەروورەن
عەبدوڵڵا وە ئەمر فەرموودەی پدەر
ڕاگەی مەدینەش دەرلاد گێرت نە وەر
ناقەی جان بازش پەرواز دا وە باڵ
ڕاهان تەی مەکەرد وێنەی بای شەماڵ
تا چەند ڕۆ وە شار مەدینە یاوا
خاستەر جە ڕەوزەی «جنت الماواعەرەبی»
جە ناگا دەردێ نازڵ بی پەرێش
بێزار بی جە زەوق زێندەگانی وێش
تا ئاخر شەربەت سەکەراتش چەشت
ڕۆحش پەرواز کەرد پەی ڕەوزەی بەهەشت
غەرەز، ئەو نەمام نەوتووڵ ساوا
عومر شەریفش وە سی ساڵ یاوا
بەرشی جەی دنیای مەلاڵ ماتەم
دیدار فەرزەند وێش نەدی وە چەم
چەنی حەسرەتان داخ و دەردەوە
سەر نیا وە خاک سیای سەردەوە
جەو دما شەخسێ وە ئاهـ و ناڵە
داش وە «مطلبعەرەبی» ئی بەد هەواڵە
«عبدالمطلب انا للهعەرەبی» وەند
مەتلیا وە زام مەرگ ئەو فەرزەند
ئامینەی بێ عەیب نەو عەرووس نۆ
کۆ بی وە باڵاش کۆی خەمان کۆ کۆ
تاکە دوو سێ ما تازیە دار بێ
ڕۆ جە ڕۆ فێشتەر زار و زگار بی
«عبدالمطلبعەرەبی» قامەتش خەم وەرد
شەوان تا وە ڕۆ هەر زاری مەکەرد