پاسخ دادن خسرو شیرین را
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
414 بینین
شا دیش جە شیرین ئەو بێ نیازی
سوپەر وست نە دۆش پەی شمشێر بازی
وات: ئەرێ شیرین چەشم و چراغم
هومای گوڵشەنم، تاوس باغم
زەوق و زینەت بەخش تاج و سەریرم
هەم جە پا ئەفگەن، هەم دەست گیرم
بیللا غەیر جە تۆ نییەن غەمخوارم
دڵبەرم تۆنی، تۆنی دڵدارم
جە یومنت، قیبڵەم، سەعیدەن بەختم
پەی وەسڵت بێزار جە تاج و تەختم
بە دین باڵات دایم موحتاجم
جە فەڕڕت ساحێب ئەی تەخت و تاجم
ئیحتیاج نییەن وێت کەری تەعریف
زەریفی، نییەن وێنەیمتۆ زەریف
لاڵ جە بەدەخشان سەر مدۆ بە سەنگ
نییەن وێنەی لاڵ لەبانت خۆش ڕەنگ
قەدئەر دەهانت بوینۆ نەمحاو
دەرسات دەهانش پڕ مبۆ جە ئاو
شۆخیی شێوەی تۆ حەق شەریف کەردەن
شیرینیت، شیرین، جە شەکەر بەردەن
ئەر بوورەشی تۆ بە چون من شایێ
جە دەستەی بۆ موشک زوڵفانت تایێ
بیللا مستانووش بە هەر هەفت کیشوەر
بە هەزار خەروار عەبیر و عەنبەر
دیدەی بەد دوور بۆ جە شۆخیی شێوەت
جە لوول زوڵفان لوولیای لێوەت
دڵ سەرشار جە جام جورعەی بادەی تۆن
قەند قەندەهار غوڵامزادەی تۆن
تووبا جە بەهەشت سەرئەفگەندەی تۆن
سونبول بەندەی زوڵف شەماڵ شەندەی تۆن
چون بەی تەور نە دەور نەخشبەند نەخشان
شێوەی شیرینی گشت بە تۆ بەخشان
سا وەس بە عەبەس شۆخ لەب شەکەر
چون سرکەی ناڕەس لێم ترش و تاڵ بەر
ئەر ڕاسەن پەی من بەی تەور وێڵەنی
پەی من سەرگەردان ئەراگێڵەنی
دەروونم وەی تەور بە زوخاڵ مەکەر
شیرینیی دنیام، شیرین، تاڵ مەکەر
سەوگەندم بە عەتر موشکین خامەی تۆ
بە خاڵ لیمۆی بۆ شەمامەی تۆ
یا مبۆ بدەی جە وەسڵت وایەم
بکەری سای چەتر زوڵفت بە سایەم
یا مبۆ چێگە هەر وە دەست وێت
بڕێزی هوونم، ئینەن واتم پێت
ئەر نەبیام مەردەی زوڵف گرنجت
داخدار نوختەی خاڵ پای زنجت
پەی چێش یەند جە تۆ مناڵامەوە
یەند بە شاهیی وێم ملاڵامەوە
تۆ بکەر دەرمان زام سەخت من
تالوخش بە تۆن تاج و تەخت من
پەی تۆ نیشتەن بار سیا جە لێوم
ڕەحمێ کەر بەحاڵ جەستەی پەشێوم
ئیمشەو ڕوخسەت دەر شیرین چەنی هەم
بویارمێ بە شاد تا وە سوبح دەم
ئاخر شەرمێ کەر جەی حاڵ نەزانی
جەفا خاس نییەن ئەوەند بنمانی