جواب دادن شیرین خسرو را به ناز
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
390 بینین
جە لاڵ پاسوخ ئەو مای قەسەب پۆش
بەی تەور شەهەنشا حەڵقە کەرد نە گۆش
وات: ئەرێ هەی دوڕ دەریای گیرامی
نادیرەی نایاب نا پەیدای نامی
من ئەو پاڵوودەم بۆ عەبیرینم
بە بێ شیرینی چەرب و شیرینم
ئەوەند هەن مەشهوور من بە شیرینیم
مواتن بەعزێ زوڵف عەبیرینیم
بە ڕاس ئەر شیرین عەبیرین مبیم
چون شەکەر جە لات هەر شیرین مبیم
بەڵێ ئیمانم یە چەندێ وەختەن
جە سەودای باڵات زامەتم سەختەن
بە وەخت و بێ وەخت تەڵەبکار تۆم
بە دیدە و بە گیان خڕیدار تۆم
مەعلووم بۆ جە لات شای ڕەوشەن زەمیر
سەوگەند بەو خودا سەمیمەن بەسیر
غەیر جە تۆ کەسم بە دۆس نەکەردەن
غەیر جە تۆ سوجدەی کەسم نەبەردەن
لەت لەت بکەران ئەر بە ئەڵماسم
هیچکەس شناس نیم، هەر تۆ شناسم
ئەمما ئەی شا من فرە دڵگیرم
کەم لوتفی، نمەز چێشەن تەقسیرم
سا چون بەی تەوری بێ دەردی مەکەر
بۆ دەس جە یەخەم، بیناییم وەردەر
شیرین تاڵ بیەن هەرچەند ئیخلاسەن
شەکەر شیرینەن ئەو پەی شا خاسەن
پەی چێش، کە شیرین بە شەرت دروستەن
شیرین چون شەکەر کەی شا پەرستەن؟
ساڵێ شیرین بیم زوڵف بۆ عەبیرین
ئیسە شەکەر هەن، تاڵ بیەن شیرین
فیدات بام بەی تەور دڵ جە سەنگ مەبەر
دوو ڕەنگی تا کەی؟ بۆ دوو ڕەنگ مەبەر
یا یار شیرین دۆس گیانی بەر
یا دۆس شەکەر ئەسفەهانی بەر
ئارێ کە شیرین قەدر وێ نەشناس
هەردوولاش بڕان بە تێغ ئەڵماس
چەنی ئێد کە دەست ئەو دی بە وەیدا
تا غەرق بی نە گێج بەحر بێ پەیدا
ئێد وات، بە توندی نە جا ئاخێز کەرد
نەرگس جە لوولەی خۆشاب لەب ڕێز کەرد
دەست بەرد بە خەشمێ ئەو شۆخ مەدهۆش
وست ماشتەی موشکی بۆ موشک وەلای وێش
پەنجەی ڕەنگین بەرد زوڵف پڕ گرنج
گرێدا نە زوڵف نە پای سێف زنج
جە قین ڕەنگش بی قرمزیی گوڵ ڕەنگ
پەخش کەرد وە پێڵدا چون لاولاو بە چەنگ
گێسووی سەر بە لوول چون مار ئەژدەر
حەڵقەدا نە دەور دائیرەی کەمەر
پشت کەرد نە خوسرەو جیهان جۆی جەم خوو
نمانا قامەت چون نەمام نۆ
ئاخر کە مەست مەست شۆخ بێ ئەندێش
خەرامان گێسووی موشکین کەرد بە کێش
وەختێ خوسرەو دیش ئەو زوڵف عەبیرین
خەراما بە خیشم جە ئێش شیرین
بە گیانت قەسەم لەت لەت بی جەرگم
ئەر نەگێڵیوە بوینی مەرگم
نەمام نەوخێز گوڵ باغچەی نەوڕەس
مودبیرەی موشکین مێخەک بۆی نەفەس
پەرێ خاتران خوسرەو گێڵاوە
شی، ئاما، نەنیشت، مدرا وە پاوە
خوسرەو وات: شیرین بەرگوزیدەی من
بۆ بنیش وەبان هەر دک دیدەی من
شیرین بۆسا پای سەریر خوسرەو
نیشت خەیلێ لێش دوور وێنەی شەمع شەو
سەرش وست نە وەر، چۆدا نە زەمین
نە چەمان مشت مشت ڕێزنا ئەسرین