pasix dadin xisru şîrîn ra
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
247 Dîtin
şa dîş ce şîrîn ew bê nyazî
super wist ne doş pey şimşêr bazî
wat: erê şîrîn çeşim û çiraẍim
humay gułşenim, tawis baẍim
zewq û zînet bexiş tac û serîrim
hem ce pa efgen, hem dest gîrim
bîlla ẍeyr ce to nîyen ẍemxiwarim
diłberim tonî, tonî diłdarim
ce yuminit, qîbłem, se’îden bextim
pey wesiłit bêzar ce tac û textim
be dîn bałat daym muḧtacim
ce feřiřit saḧêb ey text û tacim
îḧtyac nîyen wêt kerî te’rîf
zerîfî, nîyen wêneymto zerîf
lał ce bedexşan ser mido be seng
nîyen wêney lał lebanit xoş řeng
qed’er dehanit bwîno nemḧaw
dersat dehanş piř mibo ce aw
şoxîy şêwey to ḧeq şerîf kerden
şîrînît, şîrîn, ce şeker berden
er bûreşî to be çun min şayê
ce destey bo muşk zułfanit tayê
bîlla mistanûş be her hefit kîşwer
be hezar xerwar ’ebîr û ’enber
dîdey bed dûr bo ce şoxîy şêwet
ce lûl zułfan lûlyay lêwet
dił serşar ce cam cur’ey badey ton
qend qendehar ẍułamzadey ton
tûba ce beheşt ser’efgendey ton
sunbul bendey zułf şemał şendey ton
çun bey tewr ne dewr nexşibend nexşan
şêwey şîrînî gişt be to bexşan
sa wes be ’ebes şox leb şeker
çun sirkey nařes lêm tirş û tał ber
er řasen pey min bey tewr wêłenî
pey min sergerdan eragêłenî
derûnim wey tewr be zuxał meker
şîrînîy dinyam, şîrîn, tał meker
sewgendim be ’etir muşkîn xamey to
be xał lîmoy bo şemamey to
ya mibo bidey ce wesiłit wayem
bikerî say çetir zułifit be sayem
ya mibo çêge her we dest wêt
biřêzî hûnim, înen watim pêt
er nebyam merdey zułf girinicit
daxdar nuxtey xał pay zinicit
pey çêş yend ce to minałamewe
yend be şahîy wêm milałamewe
to biker derman zam sext min
taluxiş be ton tac û text min
pey to nîşten bar sya ce lêwim
řeḧmê ker beḧał cestey peşêwim
îmşew řuxset der şîrîn çenî hem
buyarmê be şad ta we subiḧ dem
axir şermê ker cey ḧał nezanî
cefa xas nîyen ewend binmanî