cwab dadin şîrîn xisru ra bih naz
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
407 Dîtin
ce lał pasux ew may qeseb poş
bey tewr şehenşa ḧełqe kerd ne goş
wat: erê hey duř deryay gîramî
nadîrey nayab na peyday namî
min ew pałûdem bo ’ebîrînim
be bê şîrînî çerb û şîrînim
ewend hen meşhûr min be şîrînîm
mwatin be’zê zułf ’ebîrînîm
be řas er şîrîn ’ebîrîn mibîm
çun şeker ce lat her şîrîn mibîm
bełê îmanim ye çendê wexten
ce sewday bałat zametim sexten
be wext û bê wext tełebkar tom
be dîde û be gyan xiřîdar tom
me’lûm bo ce lat şay řewşen zemîr
sewgend bew xuda semîmen besîr
ẍeyr ce to kesim be dos nekerden
ẍeyr ce to sucdey kesim neberden
let let bikeran er be ełmasim
hîçkes şinas nîm, her to şinasim
emma ey şa min fire diłgîrim
kem lutfî, nimez çêşen teqsîrim
sa çun bey tewrî bê derdî meker
bo des ce yexem, bînayîm werder
şîrîn tał byen herçend îxlasen
şeker şîrînen ew pey şa xasen
pey çêş, ke şîrîn be şerit dirusten
şîrîn çun şeker key şa peristen?
sałê şîrîn bîm zułf bo ’ebîrîn
îse şeker hen, tał byen şîrîn
fîdat bam bey tewr dił ce seng meber
dû řengî ta key? bo dû řeng meber
ya yar şîrîn dos gyanî ber
ya dos şeker esfehanî ber
arê ke şîrîn qedir wê neşnas
herdûlaş biřan be têẍ ełmas
çenî êd ke dest ew dî be weyda
ta ẍerq bî ne gêc beḧir bê peyda
êd wat, be tundî ne ca axêz kerd
nergis ce lûley xoşab leb řêz kerd
dest berd be xeşmê ew şox medhoş
wist maştey muşkî bo muşk welay wêş
pencey řengîn berd zułf piř girinc
girêda ne zułf ne pay sêf zinc
ce qîn řengiş bî qirimzîy guł řeng
pexiş kerd we pêłda çun lawlaw be çeng
gêsûy ser be lûl çun mar ejder
ḧełqeda ne dewr da’îrey kemer
pişt kerd ne xusrew cîhan coy cem xû
nimana qamet çun nemam no
axir ke mest mest şox bê endêş
xeraman gêsûy muşkîn kerd be kêş
wextê xusrew dîş ew zułf ’ebîrîn
xerama be xîşim ce êş şîrîn
be gyanit qesem let let bî cergim
er negêłîwe bwînî mergim
nemam newxêz guł baẍçey newřes
mudbîrey muşkîn mêxek boy nefes
perê xatran xusrew gêławe
şî, ama, nenîşt, midra we pawe
xusrew wat: şîrîn berguzîdey min
bo binîş weban her dik dîdey min
şîrîn bosa pay serîr xusrew
nîşt xeylê lêş dûr wêney şem’ şew
serş wist ne wer, çoda ne zemîn
ne çeman mişt mişt řêzna esrîn