رفتن خسرو به ولایت روم و آوردن لشکر رومی بر سر بهرام چوبین
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
495 بینین
ئێد وات چون نەسیم سەرو سوبوک خێز
ئاوەرد نە پەرواز هەر ئەو شەو شەودێز
دەروون پڕ جە خیشم چون شێر زامدار
ڕووش کەرد نە وڵات فەرخوندەی خوندکار
خوسرەو لاڵ پۆش خەجستە ئەختەر
وەختێ کە ڕووش کەرد نە موڵک قەیسەر
بە دەیر بەعزێ ڕاهیبان کەفت ڕاش
کەفتن چون سایە گشت نە خاکپاش
ئەختەرشناس بین دانای دیاری
کەردن پەی خوسرەو ئەختەر شوماری
موشتەلخدان پێش بەختت یاوەرەن
ستارەی تاڵەت سەعد ئەکبەرەن
چونکە ستارەی سەعدی چەنیتەن
بە هەر کۆ مشی ئامەدەنینەن
خوسرەو جەی مژدە شکاوا چون گوڵ
تەی کەرد وڵگەی ڕۆم مەنزڵ بە مەنزڵ
بێ تاج و تۆمار جە خۆف ڕەهزەن
تا کەرد جە سەرحەد ئەستەمووڵ وەتەن
ئاخر کە ئەحواڵ ئەو فەڕڕوخ ئەختەر
یاوا بە جەناب ججەم قەدر قەیسەر
چون زاناش بزورگ، ساحێب ئەفسەرن
کەیخوسرەو سەریر، ڕەوشەن گەوهەرەن
خێزا ئەو جەمشید نادیرەی ئافاق
کەردش ئیستیقباڵ بەسەد تومتوراق
جە ڕووی بزورگی ئابڕوو شنەخت
ئاوەردش جە لای وێش نیایش نە تەخت
قەیسەر شەهەنشای فەڵەک ئاشیان
سوڵتان جەم قەدر، قەزا تەوئەمان
دیسان جە ڕۆوی لوتف جە باب خوسرەو
تەڵەب کەرد وەزیر ئەعزەمش یەک شەو
فەرماش بە دەستوور شاهان ڕووسی
بکەرۆ پەرێ پەروێز عورووسی
وەزیر ئەعزەم بە ئەمر قەیسەر
پەی سوور خوسرەو چل ڕۆ زیاتەر
ناڵەی نەی و دەف، سەدای کووس بەرز
یاونا بە سەقف چەرخ چینی تەرز
جە پەردەی عیسمەت پێش «مەریەم» نامێ
عەفیفەی دەوران سەمەن ڕۆخ سامێ
بەخشا بە خوسرەو جە ڕای سەروەری
قیران هەم بین زوهرە و موشتەری
جە دمای خەیلێ وەخت ئەو فەڕڕوخ تەبار
تەڵەب کەرد قۆشەن بێحەد جە خوندکار
قەیسەر جە ڕای لوتف سوپای پڕ گەزەند
جە «یەنگی چەری» و «سارووچە» و «سەکوەند»
دوو پەنجا هەزار تەدارک کەردش
بە دەست خوسرەو هورمز سپەردش