riftin xisru bih wilayt rum û awirdin lişkir rumî bir sir bihram çubîn
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
465 Dîtin
êd wat çun nesîm seru subuk xêz
awerd ne perwaz her ew şew şewdêz
derûn piř ce xîşim çun şêr zamdar
řûş kerd ne wiłat ferxundey xundikar
xusrew lał poş xecsite exter
wextê ke řûş kerd ne mułk qeyser
be deyr be’zê řahîban kefit řaş
keftin çun saye gişt ne xakpaş
exterşinas bîn danay dyarî
kerdin pey xusrew exter şumarî
muştelxdan pêş bextit yaweren
sitarey tałet se’d ekberen
çunke sitarey se’dî çenîten
be her ko mişî amedenînen
xusrew cey mijde şikawa çun guł
tey kerd wiłgey řom menził be menził
bê tac û tomar ce xof řehzen
ta kerd ce serḧed estemûł weten
axir ke eḧwał ew feřřux exter
yawa be cenab cicem qedir qeyser
çun zanaş bizurg, saḧêb efserin
keyxusrew serîr, řewşen gewheren
xêza ew cemşîd nadîrey afaq
kerdiş îstîqbał besed tumturaq
ce řûy bizurgî abřû şinext
awerdiş ce lay wêş nyayiş ne text
qeyser şehenşay fełek aşyan
sułtan cem qedir, qeza tew’eman
dîsan ce řowî lutif ce bab xusrew
tełeb kerd wezîr e’zemş yek şew
fermaş be destûr şahan řûsî
bikero perê perwêz ’urûsî
wezîr e’zem be emir qeyser
pey sûr xusrew çil řo zyater
nałey ney û def, seday kûs berz
yawna be seqif çerx çînî terz
ce perdey ’îsmet pêş «meryem» namê
’efîfey dewran semen řox samê
bexşa be xusrew ce řay serwerî
qîran hem bîn zuhre û muşterî
ce dimay xeylê wext ew feřřux tebar
tełeb kerd qoşen bêḧed ce xundikar
qeyser ce řay lutif supay piř gezend
ce «yengî çerî» û «sarûçe» û «sekwend»
dû penca hezar tedark kerdiş
be dest xusrew hurimz siperdiş