cing kirdin xisru ba bihram çubîn û girîxtin bihram az sipah xisru
Li pirtûka:
Şîrîn û Xusrew
Berhema:
Xanayê Qubadî (1704-1778)
5 Xulek
305 Dîtin
erbab te’rîx be xamey mîşkîn
pey ceng xusrew behram çobîn
xaster ce boy naf wełedey sawa
ẍunçey ey kîtab çun guł şikawa
xusrew çenî ew supay ney be doş
ew deryay bê pey beḧir quzlum coş
seday kûs ceng tûs newzeř terz
ne sara û serḧed ołgey wêş kerd berz
der leḧze yawa be behram xeber
ateş efşan bî ce qîn çun ejder
nay zeřřîn ceng awerd be xuroş
cem kerd be te’cîl supay ceyḧûn coş
swar bî be cext qetre da be dew
ta yawa be cîş piř teyş xusrew
ce herdû supa ordûy xeşmigîn
lerza ce heybet hefit tebeq zemîn
ce gurdan xuroş hê hê horêza
meydan neberd meḧşer mibêza
ce birîqey şimşêr, birîqey ser ney
ce şax keman zor şax piř pey
ce zerb gopał seng be yekda heř
ce qarê’ey sext kuşnidey şeş peř
neheng ce derya megurêza be taw
çun mom be ahîr seng mibê be aw
ce herdû canîb me’rekey neberd
ne řûy çerx çetir sîmabî wiyerd
kêşaşan ne çem supay řom û řûs
sef wêney şetrenc ’ac û abenûs
poşaşan xeftan pos kergedenk
bew kewkebey berz çun dêbay fereng
ce řomî mîẍfer cewher sî temam
nyaşan ne ferq wêney sîm cam
ce me’rekey kîn piř sam sengî
pey germîy neberd gurdan cengî
xaster ce řoy řezim dara û eskender
kêşaşan beydax ejdeha peyker
berz bî bey destûr na’îrey peykar
mixêza ce nał merkeb pirşey nar
peyda kerd nałey keřna û şeypûr
zelzeley ’ezîm «yinfix fî alsurErebî»
ce połay peykan koy xara şikaf
milerza hujebir çun tûł ber taf
teberzîn ce zor şêran namî
şewq mikerd kasey ser wêney şamî
leb zam ce têẍ ełmas qatił
tebessum mikerd wêney ẍunçey guł
řêzey xûn ce seng supay pîl efgen
mibêza ’eqîq qirimzîy yemen
mewday sersenan perdey topał řeş
muyerd ce sîney şêran serkeş
şimşêr çun ebroy řend sewz kiłaf
ferq hojbiran mişkawa ta naf
semend bad ya ne meydan kîn
ẍerq bî ne hûnda ta be nimedzîn
xedeng çun mujey şox mehweşan
muyerd ce sendûq sîney serkeşan
ḧerbey xusrewî çun ebroy diłber
cerg cergey xesim mikerd dû peyker
qetrey xûn ce zam qedarey qatił
midrewşa ne řûy xar û xes çun guł
zêřey zamdaran xestey xatir teng
wêney nałey ney mişî we ferseng
zayłey zerazîl, ziřey zeng zeř
mikerd ne gerdûn goş keywan keř
ce gerd semend suran kîn
nîşt ne řûy hewa yek tebeq zemîn
ce herdû canîb koşiş kerdin sext
ser řêza ne xak çun wełk dirext
seyl hûn ce deşt me’rekey neberd
ser wêney kedû sernîgûn mikerd
ce sa’îqey sext ateş engêza
ce coş û xuroş qyamet xêza
ḧekîm ḧazîq ’îlim ḧîkmetdan
eristû destûr, eflatûn nîşan
pey sa’et sext ferxundey piř xeyr
qurs usturlab her řo mikerd seyr
sa ke nezer kerd herta ke tawa
dîş sa’et se’d mubarek yawa
’erz kerd be xusrew bextit yaweren
zû ker sitaret se’d ekberen
bawer be supay sengîy xesim şûm
bê xof û bê bak çun serser hucûm
xusrew êd şineft be leşkir hey kerd
hełmet cun hujbir be řûy duşmen berd
axir ke perwîn supay behramî
ce neyrûy neberd xusrew namî
çun «binat alin’işErebî» ne řûy serzemîn
be xeste û zamdar peragnide bîn
şikist werd supay xesim cîhan soz
xusrew firset berd be feř feyroz
behram wêney gor weḧşî gurêza
herta ke paş girt be wêş sitêza
bełî pîre çerx yekam karşen
danayan ḧeyran ce kirdarşen
menşûren ne dewr be bê mecazî
’ecayb mido ademî bazî
ewweł pêş mido padşahî û genc
axir mikeroş ce gişt ebleh řenc
bełê ’etabexiş genc be ko bełê
bełê şerit û şon tanupo bełê
ce xas şerit û beyn dił pesenditen
ce xas dadey xas bê gezenditen
dewaçey keç gerd kar pêçewane
bê sefay kem şerit şûm zemane
kêt dił weş nekerd be yek îḧsanê
axir nekerdit muḧtac be nanê
awazey îḧsan bexşendigî to
berzen ne ’ersey ey dinyay bê po
bełê sa pey kes bedgoy sitemger
ce koł migêro nimebo ta ser
behramit ewweł nişana be text
xo dît ke axir çonit kerd şinext
çunke bê poyît berden to ce gişt
lewçe kesêwen pêt bwêno pişt